Felag fyri sálarsjúk í Føroyum

Tað er mánadagur 10. mai í 1982. Vit eru stødd í Skúlanum á Trøðni í Havn, eini 40 fólk. Í dag skal avgerandi stigið takast at stovna felag fyri fólk við sálarsjúku og avvarðandi teirra. Hesin dagurin verður ein týðandi varði í føroyskari sálarsjúkusøgu, tí hendan dagin verða lunnar lagdir undir Sinnisbata. Felagið verður ikki stovnað hendan dagin, men tikið verður undir við fyribilsuppskoti til lógir til felag fyri sálarsjúk og teirra avvarðandi.

Í gerðabók felagsins stendur soleiðis hendan mánadagin í mai fyri 40 árum síðan:

„Tann 10. mai 1982 var fyrireikandi fundur hildin á Skúlanum á Trøð- ni, sum arbeiðsnevndin til stovnan av felag fyri sinnisbrekað hevði kallað saman til. Umleið 40 fólk møttu.“

Í arbeiðsnevndini sótu Berlina Hentze, Anna Olafsson, Katrin Dahl, Karin Margretha Joensen-Næs og Eyðun Joensen. Her vóru sostatt bæði fakfólk og leikfólk. Eyðun Joensen var til dømis fyrsti føroyski sálarfrøð- ingurin yvirhøvur í starvi í Føroyum, og hann starvaðist stóran part av arbeiðslívi sínum á Psykiatriska deplinum á Landssjúkrahúsinum.

Jóannes Dalsgarð var valdur til orðstýrara. Síðan varð lógaruppskot lagt fram, og fundarfólkið gekk gjøgnum lógirnar. Nøkur uppskot komu um ískoyti og til broytingar, áðrenn fundurin varð niðurlagdur.

Felagið verður stovnað

Tvær vikur eftir fyrireikandi fundin er aftur kallað til fundar í Skúlanum á Trøðni. Stovnandi aðalfundurin er settur at vera hendan mánadagin 24. mai klokkan 19.00. Hendan dagin verður ætlanin um eitt nýtt felag fyri fólk við sinnisbreki og avvarðandi teirra veruleiki.