UM OKKUM

ENDAMÁL FELAGSINS


SINNISBATI er áhugafelag teirra, ið hava sálarsjúku og avvarðandi teirra.


»Sinnisbati varð stovnað í 1982 við tí aðalendamáli at virka fyri betri korum, rættindum og tryggja javnbjóðis møguleikar fyri menniskju við sálarsjúku og avvarðandi teirra. Felagið er politiskt og átrúðnarliga óheft.

»Sinnisbati arbeiðir við støði í ST-sáttmálanum um rættindi hjá einstaklingum, ið bera brek.

»Sinnisbati er limafelag í meginfelagnum MEGD, ið arbeiðir brekpolitiskt innan øll samfelagsviðurskifti, og virkar fyri áhugamálum teirra, ið bera brek og limafeløgum teirra. Til ber at lesa meira um MEGD her.

»Sinnisbati vil at psykiatriska sjúkraøkið skal skiljast eins fjølbroytt og tað likamliga sjúkraøkið. Hetta merkir  at psykiatriska sjúkraøkið skal raðfestast eins høgt samfelagsliga, politiskt og fíggjarliga.

»Sinnisbati arbeiðir fyri at ein psykiatrisk diagnosa ikki skal vera ein forðing fyri at virka í øllum lívsins viðurskiftum, og at stuðul og hjálp verður veittur teimum, ið hava tørv á hesum fyri at virka og liva í Føroyum. Hetta skal vera á øllum pallum í samfelagnum; á stovnum, arbeiðsplássum, skúlum, útbúgvingarstovnum, hjá almennum myndugleikum, í politisku skipanini og í almenna rúminum.

»Sinnisbati ynskir at vera rødd teirra, ið aloftast ikki rópa harðast. Hjá teimum ið hvønn dag stríðast við eini sálarligari sjúku, órógvi, líðing ella avbjóðing.

HETTA GERA VIT


Arbeiðið hjá Sinnisbata fevnir breitt og vit arbeiða á fleiri ymiskum platformum til frama fyri okkara limir og málbólk.  Vit arbeiða m.a ígøgnum átøk, verkætlanir, ígjøgnum politiskt arbeiði, sosialar miðlar og lesarabræv og í samstarvi við aðrar felagsskapir og stovnar.


Í høvuðsheitum kann arbeiðið bólkast í tríggjar høvuðsbólkar:

UPPLÝSANDI ARBEIÐI

Sinnisbati ynskir at skapa størri vitan og tilvit um  sálarsjúku. Tað er vorðið alt samt lættari at tosa opið um lívið við sálarsjúku, men enn eru fordómar og stigma. Hesum vil Sinnisbati gera upp við. Tí arbeiða vit við upplýsing og at skapa størri tilvit í samfelagnum. Hetta gera vit við at skipa fyri tiltøkum og átøkum, skriva lesarabrøv og upptraðka í miðlunum. Sinnisbati skipar javnan fyri tiltøkum og átøkum, ið tæna okkara málbólki.

POLITISKT ARBEIÐI

Sinnisbati arbeiðir fyri at færri skulu gerast álvarsliga sjúk, samstundis sum at øll tey, ið verða rakt ella eru í vanda fyri at gerast sjúk, fáa tann stuðul og viðgerð, teimum tørvar. Í Føroyum eru vit ikki komin á mál við hesum. Sinnisbati arbeiðir politiskt fyri at tryggja betri sømdir og rættindi. Hetta gera vit við at vera hoyringspartur í viðkomandi málum, luttaka í arbeiðsbólkum, samskifta við politisku skipanina og almennu myndugleikarnar og fylgja við í politiska arbeiðinum.

FYRIBYRGJANDI ARBEIÐI 

Fyribyrging er lykilin, tá talan er um at forða fyri at fólk gerast álvarsliga sjúk og illa fyri. Sinnisbati ynskir at stuðla undir fyribyrgjandi tiltøkum, átøkum, gransking og øðrum, ið kann virka sálarheilsufremjandi.  Seinastu árini hevur Sinnisbati arbeitt við at veita kjatt-ráðgeving, skeið og sjálvhjálparbólkar, ið skulu virka fyribyrgjandi og sálarheilsufremjandi.