Samrøðubólkur

Gangið í mínum skóm

 

Átakið 'Gangið í mínum skóm' verður fyrstu ferð 12. juni í samband við Tórshavn Marathon. Endamálið við átakinum er at varpa ljós á sálarsjúku, og hvussu tað kann kennast at liva við sjúkueyðkennunum; í hesum førum við tunglyndi, angist og skizofreni.

Um tú luttekur til Tórshavn Marathon sunnudagin 12. juni, so fert tú møguliga at síggja fólk við gulum ballónum og faldarum - hetta eru starvsfólk hjá Almannaverkinum og Sinnisbata. Vit fara at býta faldarar út við eini QR-kotu á, og við at skanna QR-kotuna, fært tú atgongd til trý ljóðbrot um tunglyndi, angist og skizofreni. Ljóðbrotini skulu ímynda, hvussu tað kann kennast at liva við hesum sjúkueyðkennum á egnum kroppi og sinni. Tú kanst lurta ímeðan tú rennur ella gongur, og fáa eina uppliving av, hvussu avbjóðandi tað kann vera at ganga nakrar metrar við sálarsjúku.

GG* Ljóðbrotini kunnu kennast ógvuslig og vekja neiligar kenslur og minnir. Kjattráðgevingin hjá Sinnisbata er opin hvørt kvøld kl. 20.00-22.00 á Sinnisbati.fo

 

Stutt um diagnosurnar:

Tunglyndi

Tunglyndi er ein av teimum mest útbreiddu sálarsjúkunum. Fimti til sætti hvør persónur hevur ella fer at fáa sjúkueyðkenni fyri tunglyndi eina ferð í lívinum. Øll kunnu blíva rakt av sjúkuni, ung sum gomul. Orsakirnar til tunglyndi kunnu vera ógvuliga ymiskar. Summi av sjúkueyðkennunum kunnu vera: dapurskygni, kenslan av vónloysi, møði og manglandi orka í longri tíð, umframt lítil til ongin lívshugur. Tað verður bólkað sum lætt, moderat og tungt tunglyndi.

Angist (ótti)

Kenslan av ótta er ein natúrlig reaktión uppá eina uppliving av vanda, og hon tryggjar at vit handla skjótt. Í summum førum er tann natúrliga reaktiónin nógv størri enn tað, ið vandin krevur. Tá er talan um patologiskan ótta. Tað eru nógv stig av ótta, t.d. frá lættum nervøsiteti til deyðsótta, og tað eru ymisk sløg av ótta, t.d. sosialfobi, panikótti og generaliseraður ótti.

Skizofreni

Skizofreni kann ávirka tankar, kenslur og sansir. Ofta byrja sjúkueyðkennini fyri skizofreni í ungdómsárunum. Í sambandi við sálarsjúkuna kann ein uppliva sjúkueyðkennini: ranghugsan, apati og hallusinatiónir, t.d. at hoyra røddir. Skizofreni vísir seg ymiskt frá persóni til persón. Summi hava áhaldandi psykotisk sjúkueyðkenni, meðan onnur sleppa av við tey psykotisku sjúkueyðkennini.

Átakið er eitt samstarv ímillum Almannaverkið og Sinnisbata.

 

Hoyr ljóðbrotini longu nú, við at trýsta á leinkjurnar niðanfyri:

Tunglyndi: https://soundcloud.com/user-923866353/tunglyndi-1?utm_source=clipboard&utm_medium=text&utm_campaign=social_sharing

Angist: https://soundcloud.com/user-923866353/otti?utm_source=clipboard&utm_medium=text&utm_campaign=social_sharing

Skizofreni: https://soundcloud.com/user-923866353/skizofreni-1?utm_source=clipboard&utm_medium=text&utm_campaign=social_sharing

 

Ella við at skanna QR-koturnar:

Samrøðubólkur

Sinnisbati móttikið stuðul

Alt vikuskiftið hevur Norðurlandahúsið verið karmur um FO TATT FEST. Til festivalin hevur uppboðsøla verið av málningi, sum Livar Nysted hevur málað, og í dag endaði sølan. Málningurin varð seldur fyri 20.000 krónur, og allur peningurin verður latin til arbeiðið hjá Sinnisbata.

Vit í Sinnisbata takka mangar ferðir fyri stuðulin, og eru vit sera rørd av hesi flottu gávu. Allur stuðul ger stóran mun í okkara arbeiði.

Vit vilja takka fyriskiparunum av Fo Tatt fest, Livari Nysted og keyparanum av málninginum.

Samrøðubólkur

Sinnisbati 40 ár

Týsdagin tann 24. mai fyllir Sinnisbati 40 ár. Tað eru nú 40 ár liðin, síðani stovnandi aðalfundin hjá Sinnisbata í 1982, har stig varð tikið til at stovna felag, sum skuldi arbeiða fyri fólki við sálarsjúku, og avvarðandi teirra.

Vit vilja fegin hátíðarhalda dagin saman við tykkum, og skipa í hesum sambandi fyri almennum føðingardegi og bókaútgávu í Reinsarínum.

Í samband við føðingardagin gevur Sinnisbati, saman við Sprotanum og Grækaris Djurhuus Magnussen, bók út um søguna hjá felagnum. Til tiltakið verður bókin løgd fram, og prát verður við Grækaris um bókina. Prát verður eisini við tvey av fólkunum í nýggju bókini, ið hava myndað felagið og føroysku sálarsjúkusøguna. Møguleiki verður eisini fyri at keypa bókina hetta kvøldið.

Umframt hetta, vísir Sinnisbati Ung ein nýggjan stuttfilm fram, og Herborg Torkilsdóttir kemur at spæla eitt nýtt lag fyri okkum.

Øll eru hjartaliga vælkomin. Sinnisbati bjóðar føðingardagskøku og kaffi.

 

Leinkja til tiltakið á Facebook: https://www.facebook.com/events/309229121368761?ref=newsfeed

Samrøðubólkur

Gunnhild Persson er nýggjur aðalskrivari í Sinnisbata

Gunnhild Persson

Gunnhild Persson er sett í starv sum aðalskrivari í Sinnisbata. Hon tók við starvinum 1. apríl 2022.

Gunnhild Persson er 27 ára gomul, býr í Tórshavn og er útbúgvin innan politikk og umsiting. Gunnhild hevur gott innlit í føroyskar áhugafelagsskapir og hevur fleiri ára royndir í nevndararbeiði. Hon hevur eitt breitt innlit í føroysk samfelagsviðuskifti og politisku skipanina.

8 umsóknir komu inn til starvið sum aðalskrivari í Sinnisbata.

Gunnhild fer sum aðalskrivari í Sinnisbata at hava ábyrgd av dagligu umsitingini og samskipan av størri verkætlanum og tiltøkum, umframt átøkum og kunningararbeiði. Harafturat fer hon at arbeiða við limarøkt og fundraising.

Samrøðubólkur

Laura takkar fyri seg

Laura Apol, ið hevur arbeitt sum aðalskrivari í Sinnisbata síðani 2017, takkar fyri seg:

Síðani 2017 havi eg arbeitt sum aðalskrivari í Sinnisbata. Eitt arbeiði eg havi verið sera takksom og glað fyri. Eg havi lært so ómetaliga nógv. Um samfelagið, og ikki minst um meg sjálva. Eg hevði ikki vilja verið allar royndirnar fyri uttan, og eg eri vís í, at tær koma at hjálpa mær frameftir. Eg eri ómetaliga takksom fyri álitið felagið hevur víst mær, fyri gott samstarv við samstarvsfelagar og fyri øll tey fantastisku fólkini, eg havi hitt gjøgnum mítt arbeiði gjøgnum seinastu árini. Ikki minst tey mongu tiltøkini, vit hava skipað fyri og átøkini, vit hava sett í verk. Eg eri sera errin av at hava verið partur av øllum hesum.

At arbeiða fyri og við menniskjum við sálarligum avbjóðingum, fólkum við brekum, og at vera við í bardaganum fyri javnstøðu og rættvísi, stendur mínum hjarta sera nær. Tað verður ikki broytt, hóast eg nú fara at gevast í Sinnisbata. Men tíðin er komin til at royna nakað nýtt og lata nýggjar kreftir sleppa framat.

Hvat nú skal henda er ikki heilt komin upp á pláss enn, men keða meg fari eg nokk neyvan. Eg havi fleiri jørn í eldinum, fleiri verkætlanir, eg arbeiði við, og fleiri eg ynski at fara í holt við. Til dømis vil eg fegin brúka meira orku upp á tað kreativa, ið eg elski at fáast við.

Tað er sjálvsagt kensluborið, at siga farvæl við eitt starv, ið er so nógv meira enn eitt starv. At arbeiði í einum áhugafelag, einum hjálparfelagsskapi, ein NGO, er ein lívsstílur. Tað krevur, at tú brennir fyri økinum og fyri at broyta samfelagið til tað betra, og tað krevur, at tú áhaldandi trýr uppá, at broytingarnar kunnu henda, og gleðast um tær smáu sigrarnar.

Sinnisbati fyllir 40 ár 24. mai, og nógv er hent gjøgnum øll hesi árini. Eg eri takksom fyri og errin av, at eg havi verið ein partur av arbeiðnum í 17% av hesum árinunum. Men tað er eisini 23% av mínum egna lívi. Nógv er hent á psykiatriska økinum bara ta tíðina, eg sjálv havi verið í felagnum. Nógv er hent í mun til hugburð í samfelagnum, og sum heild eru vit á góðari leið til eitt meira javnbjóðis samfelag, eisini fyri fólki, ið hava sálarsjúku og avvarðandi teirra. Nakað er tó enn á mál, til enn vit kunnu siga, at Sinnisbati hevur røkt sína skyldu og politiska raðfestingin er har, hon átti at verið. Nógv kann henda uppá stutta tíð, um bara viljan og dirvið er har. Eg hopi og vóni, at ein føðingardagsgáva til Sinnisbata verður eina psykiatrisk skaðastovutilbúgving, ið felagið hevur arbeitt fyri og ynskt í nógv ár. At tað verður hægri játtan, soleiðis at felagið kann styrka starvsfólkaorkuna í felagnum, nú vit fingu eitt methøgt tal av áheitanum í 2021. Yvir 1300 fólk vendi sær til felagið. Og so ynski eg, at fyribyrgjandi ráðgevingartilboðið ætlað ungum føroyingum, Headspace, fær eina játtan, og verður sett á stovn innan stutta tíð, soleiðis at vit kunnu fyribyrgja, at ung fáa so ilt í sálini, at tey hava tørv á sálarligari og psykiatriskari viðgerð.

31.mars er mín seinasti starvsdagur í Sinnisbata. Eg gleði meg at síggja, hvør fer at røkja hetta týdningarmikla starvið í hesum fantastiska felagagnum, ið rúmar nógvar eldsalir, dirvi og áhaldni.

Alt tað besta til tykkum øll. Takk fyri meg.

Samrøðubólkur

Vit vísa “ROSE” í Filmsfelagnum 20. apríl

20. apríl kl 20:00 verður "Rose" sýndur í Filmsfelagnum.
Koronastongsulin er av og øll droyma um at ferðast, ikki minst til søguríka franska høvuðsstaðin París.
Saman við Filmsfelagnum fara vit í huganum hagar, tá vit vísa nýggja danska filmin ”Rose”.
Hetta er ein sterk og hjartanemandi søga um familjusambond og kærleika, og um at einki er so einfalt, sum tað av fyrstan tíð sá út til. Vit eru í árinum 1997. Inger (Sofie Gråbøl), systurin Ellen (Lene Maria Christensen) og svágurin Vagn fara við ferðafólkabussi úr Aalborg til París.So skjótt bussurin er komin út á motorvegin, sigur Inger øllum ferðafólkunum frá um sálarligu støðuna hon er í og tær avbjóðingar, hon hevur. Úrslitið er, at eingin av teim ferðandi fer at gloyma vikuferðina til býðanna bý. Orsøkin er, at Inger hevur eina fjalda dagsskrá, sum er at finna og vekja aftur eitt gamalt kærleikssamband, so skjótt París nærkast.
Umframt Sofie Gråbøl og Lena Maria Christensen, síggja vit eisini Anders W. Berthelsen og Søren Malling í filminum.Leikstjóri er Niels Arden Oplev. ”Rose” er hin mest persónsligi filmur hjá Niels Arden Oplev, sum fyrr hevur gjørt filmin ”Ser du månen, Daniel”, ”Mænd, der hader kvinder”, ”Drømmen”, ”Kapgang” og einsini sjónvarpsfilmar í USA.
Filmurin "Rose" er 106 minuttir til longdar.
Samrøðubólkur

Nýtt poddvarp fer í luftina!

Nýggja poddvarpið TØGN um tað, ið vit ikki tosa um, kemur út mikudagin 2. mars!
Sinnisbati hevur í longri tíð arbeitt við eitt poddvarp, ið skal lýsa sálarheilsuøkið úr ymiskum sjónarhornum. Nú eru vit langt um leingi klár, og kann í samstarvi við Sinnisbata Ung, gleða okkum til mikudagin, har fyrsti partur verður almennur.

Poddvarpið TØGN snýr seg um tað, ið er torført at tosa um. Tað, ið er tabu. Men ikki longur - nú bróta vit tøgnina.

Partur 1 ber heitið "Ung og sálarheilsa". Í poddinum verður prátað við Magna Mohr, formann í Fólkaheilsuráðnum, eitt Voxpop er gjørt millum ung, har spurt var um teirra tankar. Eisini verður prátað  við Tóru Petersen, sálarfrøðingur og trivnaðarráðgevi í NÁMI. At enda lurta vit eftir sanginum, ið kemur at mynda hesa poddvarpsrøð.

Lagt til rættis: Anna Joensen-Næs og Laura Apol.

Poddurin verður at hoyra á Spotify og SoundCloud:

Samrøðubólkur

Aðalskrivari til Sinnisbata

Vilt tú vera við til at menna og standa á odda fyri Sinnisbata, áhugafelag teirra, ið hava sálarsjúku og avvarðandi teirra í Føroyum? Eitt áhugavert, mennandi og avbjóðandi starv sum aðalskrivari hjá Sinnisbata er leyst at søkja.

Um Sinnisbati

Sinnisbati er ein sjálvboðin áhugafelagsskapur hjá teimum, ið hava sálarsjúku og avvarðandi teirra. Hvønn dag arbeiða vit fyri at bøta um korini hjá teimum, umframt at kunna um sálarsjúku og skipa fyri átøkum, sum kunnu lætta um gerandisdagin hjá teimum við sálarsjúku og avvarðandi teirra.

Starvið

Vit kunnu bjóða tær eitt spennandi, áhugavert og avbjóðandi starv, har tú hevur stóra ávirkan á virksemi í felagnum. Saman við nevndini hevur tú ábyrgd av øllum virkseminum í felagnum. Virksemið í felagnum er nógv økt síðstu árini, og økist støðugt. Hetta krevur, at tú ert førur fyri at hava nógvar bóltar í luftini samstíðis uttan at missa yvirlitið.

Sum aðalskrivari arbeiðir tú við:

– At hava ábyrgdina av at avgerðir hjá nevndini verða framdar í verki.

– At kanna møguleikar fyri at fremja ynskjum hjá nevndini.

– At økja um inntøkurnar hjá felagnum.

– At hava samband og samskifti við MEGD, myndugleikar, samstarvsfeløg og viðkomandi stovnar.

– At samskipa verkætlanir og tiltøk.

– At skriva kunningar- og tíðindaskriv, umframt hoyringsskriv og svar.

– At sita í arbeiðsbólkum, sum umboð fyri Sinnisbata.

Vit ynskja hesar førleikar:

– Tú ert eldhugaður og hevur kunnleika til psykiatriska økið.

– Tú hevur gott innlit í føroysk politisk- og samfelagsviðurskifti.

– Tú dugir væl at málbera teg á føroyskum.

– Tú hevur góð samstarvsevni og ert álítandi.

– Tú er fyrikomandi og sinnaður til at traðka fram í miðlum um neyðugt.

– Tú tekur stig til nýggj tiltøk og brúkar títt hugflog.

– Tú kanst arbeiða sjálvstøðugt.

– Tú hevur góðan telduførleika.

– Tú er struktureraður, hevur yvirlit og góðar fyrisitingarførleikar.

– Fyrimunur er, um tú hevur umsitingar- og leiðsluroyndir, tó ikki eitt krav.

Á skrivstovu felagsins arbeiðir eisini eitt skrivstovufólk 10 tímar um vikuna, umframt at fleiri sjálvboðin og fríyrkisstarvsfólk eru knýtt at felagnum. Hesi hevur aðalskrivarin dagligu ábyrgdina av.

Løn/setanartreytir

Starvið er normerað til 30 tímar um vikuna, starvsbrøkur 3/4. Starvssetanin er frá 1. apríl 2022 ella eftir nærri avtalu. Lønin er sambært sáttmála millum fíggjamálaráðið og avvarðandi fakfelag.

Meira fæst at vita um starvið við at venda sær til Lauru Apol, á tlf 597913 ella á teldupostinum sinnisbati@sinnisbati.fo Umsókn saman við prógvum, viðmælum v.m. skal sendast til Sinnisbata, umvegis teldupost til sinnisbati@sinnisbati.fo. Viðmerk “umsókn” á teldupostin.

Umsóknarfreistin er 22. mars 2022 kl. 12:00. Meira kunning um arbeiðið hjá Sinnisbata kann finnast á heimasíðu felagsins: www.sinnisbati.fo