LauraApol_Sinnisbati

Áheitan til avvarðandi myndugleikar: Størri ábyrgd má vísast og gongd má koma í

Tað er ørkymlaðandi at hoyra, at royndarverkætlanina um at veita ókeypis sálarfrøðiliga hjálp til ung millum 15 og 35 ár enn einaferð er steðgað upp. Pengarnir eru játtaðir, verkætlanarleiðari er settur og bíðað hevur verið leingi - bæði tey, sum skulu veita tilboðið og tey, sum skulu gera brúk av tilboðnum.

Ongantíð áður hevur verið so stórur tørvur á einum slíkum tilboðið sum júst nú. Alsamt fleiri ung uppliva sálarligar avbjóðingar. Hesar avbjóðingar eiga vit at taka í stórsta álvara og fyribyrgja skjótast til ber, so støðan ikki versnar hjá tí einstaka. Tað gera vit ikki við at lata ósemjur og teknikalitetir forða fyri, at tilboðið kann vera til gagns hjá borgaran.

Sinnisbati hevur í fleiri ár víst á avbjóðingarnar og manglandi fyribyrgjandi átøk, og jaligt er at síggja, at vit í Føroyum nú kunnu kalla okkum framgonguland á hesum økinum við at pengaranir eru oyramerktir til eina verkætlan, sum skal tryggja ungum við angist og tunglyndi ókeypis sálarfrøðiliga viðgerð. Hetta er ikki einans eitt tilboð, sum kemur tí einstaka unga til gangs, tað er somuleiðis eitt tilboð, tey avvarðandi hava bíðað leingi eftir.

 Seinasti tíðina er áheitanartalið hjá Sinnisbata voksið munandi, eins væl og tað er hjá flestu sálarfrøðingum. Heilt nógvar áheitanir, sum Sinnisbati fær, snúgva seg júst um, nær hetta tilboðið kemur í gildi. Spurningar og frustratiónir um, hvat bíðað verður við.

Sinnisbati vil við hesum innarliga heita á partarnar um at koma til eina semju og biðja avvarðandi myndugleikar vísa størri ábyrgdakenslu fyri at náa á mál sum skjótast.

 Hetta skrivið er sent til Heilsumálaráðið og Fíggjamálaráðið.

 

Vegna Sinnisbata

 

Laura Apol, aðalskrivari

LauraApol_Sinnisbati

Tíð er til at handla – tíð er ikki til at bíða 

Nýggj kanning hjá Fólkaheilsuráðnum er júst blivin almen. Umleið 3.000 føroyingar eru ein partur av kanningi, og tí má sigast, at úrslitið má takast í størsta álvara, tá umleið 6% av íbúgvunum eru við í kanningini. 

Kanningin vísir nógv ymisk úrslit um fólkaheilsuna hjá føroyingum, men eingin ivi skal vera í, at summi av úrslitini eru meira ørkymlaðandi enn onnur. 

Í Sinnisbata eru vit mest av øllum upptikin av, hvussu føroyingar hava tað sálarliga, og hvussu vit kunnu arbeiða sálarheilsufremjandi og á tann hátt kann virka fyribyrgjandi í at fólk gerast sálarliga sjúk. Nýggja fólkaheilsukanningin hjá Fólkaheilsuráðnum er tí sera ørkymlandi og lítið hugaligur lesnaður. 

Kanningin vísir, at serliga ung í Føroyum hava tað torført sálarliga, og enntá verri, um vit samanbera okkum við onnur norðurlond. Hetta er ikki nakað vit í samfelagnum, landspolitiskt og kommunalt, kunnu síggja burtur frá. Um hesi tølini samsvara 1:1 við veruleikan, so merkir hetta, alt annað líka, at har er nakað, sum ikki er gjørt rætt, í mun til hvussu vit hava sett okkara samfelag saman. Okkurt er skeivt í okkara politisku raðfesting. 

Vit vita frá tølum og kanningum úr londum vit samabera okkum við, at sálarligar sjúkur eru størsta sjúkrabyrðan millum ung, og altjóða heilsustovnurin WHO vil vera við, at tunglyndi fer at vera størsta sjúkrabyrðan í heiminum yvirhøvur í 2030. Somuleiðis vita vit út frá donskum kanningum, at helvtin av øllum sálarligum sjúkum taka seg upp hjá teimum ungu áðrenn 14 ára aldur og 75% áðrenn 24 ára aldur. Hetta eru tøl, sum eru til at taka og føla uppá. 

Kanningin hjá Fólkaheilsuráðnum sigur okkum millum annað, at fimta hvør kvinna og tíggjundi hvør maður í aldrinum 18-24 ár hava havt eina sálarliga sjúku, sum hevur vart longri enn seks mánaðir. Haruftrat sigur kanningin okkum, at onnur hvør kvinna og triði hvør maður í aldursbólkinum 18-24 ár kenna seg strongd. Tað eru tey lesandi, sum kenna seg mest strongd og talið er heilt uppi á 48%. 

Tað er ikki eitt loyndarmál, at psykiatriska økið als ikki er raðfest nóg høgt politiskt, hóast økið er raðfest munandi hægri seinnu árini. Har er langt á mál. 

Altjóða heilsustovnurin metir, at psykiatrisk viðgerð í heilsuverkinum í Europa fyllir 20%, hóast psykiatriska økið í fíggjarætlanum í miðal er umleið 5%. Hetta merkir, at trupulleikin ikki bara er her í Føroyum, men tað er ein heimstrupulleiki, sum vit mugu taka í álvara. Úrslitið av manglandi raðfesting og fyribyrging síggja vit nú og koma at síggja meira til tað framyvir, um ikki við gera okkurt munagott beinanvegin. Kommunur og landið, stovnar og feløg í felag. Tað ber ikki til at siga tað ov ofta. Talan er ikki bara um væntandi viðgerð og tilboð á psykiatriska deplinum, langa bíðitíðir og manglandi starvsfólk. Tað er allan vegin ígjøgnum, at vit mugu seta inn. Fleiri ressoursir mugu gevast til økispsykiatriina, sosialpsykiatriina og aðrar stovnar og feløg, sum arbeiða sálarheilsufremjandi.

Ein samskipandi eind má vera, so myndugleikar, stovnar og feløg, sum veita tilboð og ráðgeving, tosa betri saman og hava eitt felags útgangsstøði, so tey ungu kunnu loftast nógv skjótari. Vit eru komin væl ávegis við nýggja tilboðnum, sum herfyri bleiv einmalt samtykt í Løgtinginum, ókeypis sálarfrøðilig hjálp til ung millum 15-35 ár. Men tilboðið kann ikki standa einsamalt í royndini at hjálpa uppundir sálarheilsuna hjá teimum ungu. Tilboðið er ætlað teimum, sum longu eru blivin sjúk av angist og tunglyndi. Vit mugu forða fyri, at tey ungu koma har út, at ein diagnosa at hesum slagið er neyðug. Vit mugu fyribyrgja og hava ein felags leist fyri, hvussu vit best møguligt lofta teimum ungu. Fyrbyrging er lykilin. 

Hjá Sinnisbata síggja vit, at nógv av teimum ungu, sum fáa ráðgeving, hava avbjóðingar við at handfara gerandisdagin, føla einsemi, hava trupulleikar við familju og vinum og hava sum heild hava torført við at liva eitt ungdómslív, sum kann rúma nógvum avbjóðingum. Hjá teimum ungu, sum liva í heimum, har avbjóðingar framanundan eru, so sum rúsdrekka og rúsevnir, harðskapur, álvarsligar sjúkur og kynsligur ágangur, eru avbjóðingarnar bara uppaftur størri. Hesi ungu eru serligt útsett fyri at fáa sálarligar avbjóðingar í lívinum - og vit skylda teimum ungu, at gera alt vit kunnu fyri at lofta teimum áðrenn, tey gerast viðgerðakrevjandi. 

Tað ikki bara verjir nógvum fólkum frá avbjóðingum og ringum lívsumstøður í framtíðini - tað er eisini at spara samfelagnum fyri stórum fíggjarligum útreiðslum. Og samfelagið er vit - tað er tú og eg! 

/Laura Apol, aðalskrivari í Sinnisbata

Les meira her: Fólkaheilsuráðið

LauraApol_Sinnisbati

Ung ið bera brek

Týsdagin 25. novembur, mikudagin 26. novembur og hósdagin 27. novembur, eru vit við at umboða ung í Føroyum, ið bera brek á fundi hjá partur av Nordisk Ministerråd.

Meginfelagið, MEGD, situr í tí sum eitur "Rådet för nordiskt samarbete om funktionshinder". Har eru tvey ung føroysk umboð bjóðað við, at luttaka á fundinum og greiða stutt frá avbjóðingarnar vit síggja her í Føroyum. Eitt umboð er úr Sinnisbata. Vit eru sera fegin at sleppa við á slíkum fundum, sleppa til orðana og ikki minst, at vera við at sera fokus á brekøkið í eitt breiðari høpi.

Tað er Nordens välfärdscenter, sum skipar fyri fundin. Eisini hevur Nordens välfärdscenter givið út bókling um tað at inndraga børn og ung í arbeiðnum á brekøkinum:

Inga barn eller unga ska lämnas utanför

Tak niður her (á svenskum):

Inga-barn-eller-unga-ska-lämnas-utanför

No child or young person should be left behind

Nordens välfärdscenter hevur gjørt og orðað fleiri bóklingar innan brekøkið. Sí fleiri teirra niðanfyri.

Politikk for likestilling for personer med funksjonsnedsettelser i Norden

Norden för alla

LauraApol_Sinnisbati

Hevur tú hug at ráðgeva og hjálpa fólkum, ið hava avbjóðingar?

Ert tú ein av okkara nýggju ráðgevum?

Seinasti árið hevur Sinnisbati bjóðað talgilda ráðgeving til borgarar. Ráðgevingin hevur verið væl vitjað og avbjóðingarnar hjá fólki, sum hava vent sær til ráðgevingin, hava verið sera fjølbroyttar. Felags fyri allar samrøðurnar hevur verið, at talan eru um menniskju, ið hava tað trupult, og tað ger, at tey hava tørv á ráðgeving og vegleiðing. Flestu samrøðurnar eru ein ráðgevingarsamsrøða, meðan nakrar eru afturvendandi. Øll, sum venda sær til ráðgevingina, kunnu verða dulnevnd, eins væl og ráðgevarnar eru tað.

Kjatt-ráðgevingin er opin hvørt kvøld frá kl. 20-22, og er at finna á www.sinnisbati.fo.

Vit leita eftir fleiri ráðgevum til okkara toymi, sum er mannað við dugnaligum fakfólkum innan ymisk yrkisøki, t.d. námsfrøði, misbrúkviðgerð, psykoterapi, sálarfrøði og sosialar ráðgeving.

Talan er um eitt toymi av óløntum ráðgevum.

Les meira um talgilda ráðgeving hjá Sinnisbata á www.sinnisbati.fo. Har ber eisini til at finna hagtøl og nærri greining av teimum avbjóðingum tey, ið skriva inn, dragast við.

Vit vænta:

  • at tú hevur heilsu-, námfrøðiliga ella sosialfakliga útbúgving. Onnur við viðkomandi royndum innan líknandi ráðgeving eru vælkomin at søkja. Lesandi innan heilsu, námfrøðiliga ella sosialfakliga útbúgving eru vælkomin at søkja, tó skulu hesi hava lokið minimum bachelor stig (serlig uttantøk kunnu koma fyri).
  • at tú hevur viðkomandi starvsroyndir innan ráðgeving og vegleiðing av fólki.
  • at tú hevur gott innlit í samfelagsviðuskifti og psykiatri.
  • at tú hevur góðar førleikar innan skriftligt samskifti, tí tað ofta hevur stóran týdning, at viðkomandi, sum skrivar, fær skjótt svar.
  • at tú hevur góðar menniskjaligar førleikar og ynskir at vera og gera nakad gott fyri onnur.
  • at tú ikki hevur drigist við sálarliga sjúku seinastu tvey árini (viðgerð/innleggingarkrevjandi).
  • at tú kann taka mininum eina ráðgevingarvakt á 2 tímar um vikuna.

Vit bjóða:

  • Eitt mennandi og avbjóðandi sjálvboðið starv
  • Góða upplæring í talgildari ráðgeving
  • Sálarlig fyrstuhjálparskeið
  • Loypandi supervisjón
  • Góðar og lærurík royndir til framtíðarstørv

Umsókn og freist:

Ljóðar hetta spennandi, og er hetta nakað fyri teg? So er at senda tína umsókn til sinnisbati@sinnisbati.fo, har tú hjáheftir prógv og lívsrensl.

Freistin at søkja sjálvbodnu ráðgevingarstørvnini er fríggjadagin 18. desembur 2020 á miðdegi.  Starvssamrøður verða hildnar í viku 1, 2021.

Hevur tú spurningar til sjálvbodna ráðgevingarstarvið, kjatt-ráðgevingina ella til Sinnisbata, ber til at seta seg í samband við Lauru Apol, aðalskrivari, á teldupost laura.apol@sinnisbati.fo.

LauraApol_Sinnisbati

Sinnisbati bløðini eru nú teldutøk

Sinnisbati blaðið sum felagið einaferð árliga hevur givið út seinastu trý árini, eru nú teldutøk og kunnu frítt nýtast í undirvísing ella í øðrum viðkomandi samanhangum. Neyðugt er tó at vísa á týðuligari kelduávísing.

2018

2019

2020

Heinta blaðið niður her: Sinnisbati blaðið_2018

Heinta blaðið niður her: Sinnisbati blaðið_2019

Heinta blaðið niður her: Sinnisbati blaðið_2020

LauraApol_Sinnisbati

Kommunuvalið 2020: Vel meg – tí eitt menniskja eri eg

Fáa tær eina Facebook-rammu fram til Kommunuvalið 2020, fyri at vísa á, at tú ynskir at meira dentur verður lagdur á sosiala trivnaðin og sálarligu heilsuna!

Sinnisbati ynskir at geva sítt íkast til valstríðið og politiska kjakið, við at seta sjóneykuna á ymisk politisk evni, sum felagið heldur vera viðkomandi í sambandi við komandi kommunuval. Vit ynskja við hesum at vísa á eina síðu av politiska kjakinum, sum vit meta er alt ov lítið er at síggja, og leggja dent á evni, sum eru viðkomandi fyri borgarar í samfelagnum, sum tíverri eiga ov lítla rúmd. 

Eitt eru tung politisk og fíggjarlig mál, sum innkomuvegur, tunnlar, bygningar, kloakkir og grót. Eitt annað err sosial mál, sum røra borgararnar her og nú, og sum hava alstóran týdning fyri trivnaðin og sálarligu heilsuna. 

Slagorðið hjá Sinnisbata fram til kommunuvalið hin 10. november er “Vel meg - tí eitt menniskja eri eg”.

Tankarnir aftanfyri hetta slagorðið eru: Vit skulu hvør sær, tá vit fara á val eins og tey sum stilla upp til val, hugsa um menniskjað.

Tað kann tykjast sum um  tað verður løgd nógv orka í stór tung politisk mál, heldur enn at síggja hvønn einstakan borgara í einum meira fjølbroyttum ljósi. Tí siga vit “Vel meg”, sum skal vísa til, at hugsað verður um teir borgarar, sum ikki fylla so nógv í politiska kjakinum - og “tí eitt menniskja eri eg”, tí tað at vera ein borgari í eina kommunu, har nógv verður gjørt fyri sosiala trivnaðin og har sálarliga heilsan verða tryggjað, hevur stóra týdning fyri, hvussu vit sum menniskju klára okkum og megna lívið, tá vit møta avbjóðingum. 

Í sambandi við, at Sinnisbati komandi vikurnar fer at senda skriv til uppstillaðu valevnini kring landið og leggja ymisk ítøkilig politisk ynski út á heimasíðu felagsins at lesa, hava vit sniðgivið eina Facebook-rammu við slagorðinum. Vit vóna, at nógvir føroyingar vilja taka rammuna til sín og nýta hana fram til valið. Við rammuni ber til sum einstakur borgari í kommununum kring landið at vísa á, saman við Sinnisbata, at ynskt verður, at dentur verða lagdur á teg og meg sum menniskju. Ikki í staðin fyri nakað annað, men sum ein líka stórur partur.

Við hesum vilja vit ynskja øllum eitt sera gott val og gott valstríð til øll tykkum, sum eru uppstillað.

Beinleiðis leinki:

www.facebook.com/profilepicframes/?selected_overlay_id=3664167003641851

LauraApol_Sinnisbati

Ikki rætta staðið at spara

Eitt av málunum, sum í morgin, 8. oktobur, fer til 1. viðgerðar í tinginum, er uppskotið um broyting í løgtingslóg um arbeiðsfremjandi tiltøk hjá Almannamálaráðnum. Málið hevur longu verið nógv til viðgerðar í fjølmiðlum og hjá avvvarðandi stovnum og feløgum, sum varða av teimum fólkunum, sum uppskotið kemur at hava avleiðingar fyri.

Tað er eingin loyna, at uppskotið fyllir nógv hjá Sinnisbata og limum felagsins, sum eru í tillagað størvum ella eru avvarðandi, og sum við hesum broytingunum koma at blíva rakt.

Sinnisbati vil við hesum upp á tað kraftigasta frámæla, at hesa broytingarnar verða framdar í løgtingslógini um arbeiðsfremjandi tiltøk. Tað er rætt og slætt ikki rætta stað at spara pengar. Talan er um 1,5 mio. krónur, sum Almannamálaráðið metir at broytingarnar í lógini fer at hava við sær av sparingum her og nú, men avleiðingarnar fyri borgararnar, sum eru í skipanina, eru stórar.

Broytingarnar kunnu fáa sera stórar avleiðingar, ikki bara fíggjarliga, men eisini menniskjasliga. Tað at kunna vakna um morgunin og føla, at tú gert mun fyri samfelagið og kanst geva íkast við at fara til arbeiðis - um tað bara eru fáir tímar um vikuna, hevur alstóran týdning. Sannleikin er, at fleiri av hesum fólkunum, um hendan skipanin ikki var til, høvdu verið fyritíðarpensionistar. At fáa møguleikan at virka á arbeiðsmarknaðinum, hóast skerdar arbeiðsførleikar, er nakað, sum gevur innihald í lívinum, og tað er ringt at seta krónur og oyrir á. Tað er ringt at ímynda sær, hvussu stórar avleiðingar hesi broytingarnar kunnu hava við sær, men ikki ringt at ímynda sær, at avleiðingarnar koma at kosta landskassanum  - og samfelagnum munandi meira í hinum endanum, tí hesi menniskju koma at hava fyri neyðigini at brúka aðrar skipanir; summar sum fíggjarliga kostar munandi meira og ikki geva líka stóra lívsgóðsku, sum tað at geva eitt ískoyti til at fáa samfelagshjólini at mala.

Sinnisbati vónar og heitir á Landsstýriskvinnan í Almannamálum og løgtingslimir, bæði í samgongu og anstøðu, um at taka frámælini um samtykt av hesum uppskotinum, í størsta álvara.

 

Róa Midjord, forkvinna í Sinnisbata

LauraApol_Sinnisbati

Fyrilestur við Rudi Køhnke: Ein dansur við óttanum – ein frásøgn um eitt lív við angist og vón

Danski sjónleikarin, Rudi Køhnke, sum vit kenna frá filminum “Fuglefangerens Søn”, har hann spælir føroyski Esmar, kemur aftur til Føroyar.

Í sambandi við hansara luttøku á talgilda tiltakinum á Altjóða Sálarheilsudegnum tann 10. oktobur, heldur hann fyrilestur um sítt lív við angist í Norðurlandahúsinum sunnukvøldið 11. oktobur kl. 20.

Rudi fekk sítt gjøgnumbrot sum sjónleikari í filmunum “Nordkraft” og “Fidibus” í 00’unum. Síðan hevur Rudi verið at sæð í fleiri filmum og sjónvarpsrøðum, millum annað í krimirøðini “Bedrag” og í filminum “Christian IV - Den sidste Rejse” frá 2019, har hann spælir høvuðsleiklutin sum tann ungi Christian kongur.

Í 2018 greiddi Rudi opið og erligt frá um eitt lív við ótta í DR sjónvarpsrøðini “Rudi er bange” (sí meira her: https://www.dr.dk/drtv/serie/rudi-er-bange_6849). Hann hevur drigist við angist síðan hann var barn, og óttin hevur ávirkað lív og yrkisleið hansara neiligt í fleiri førum. Men í dag hevur Rudi lært at liva við sínum ótta og hevur funnið amboð, sum kunnu hjálpa honum at dansa við óttanum, heldur enn at arbeiða ímóti, hóast hansara angist roynir at hála hann niður.

Angist er ein teimum mest útbreiddu psykiatrisku diagnosunum, og hon kann raka okkum øll. Tað sigst, at vit øll í minsta lagi kenna ein, íð hevur angist og upplivir ótta. Hóast hetta er enn eitt stórt tabu kring tað at liva við angist.

Sinnisbati ynskir við fyrilestrinum, at varpa meira ljós á angist og vera við til at fremja meira opinleika og størri fatan í føroyska samfelagnum kring lívið við angist.

Tiltakið er ókeypis, men neyðugt er at tekna seg til fyrilesturin á www.nlh.fo, tí atgongd er einans fyri 100 fólkum. Hetta er fyri at halda COVID-19 tilmælini um smittuvanda, frá heilsumyndugleikunum.

Tiltakið er eitt samstarv ímillum Sinnisbata og Norðurlandahúsið.

LauraApol_Sinnisbati

Altjóða Sálarheilsudagur 2020 – skráin er klár!

Altjóða Sálarheilsudagur-tiltakið, sum vit kenna tað, er avlýst.

Undir vanligum umstøðum, hava vit seinastu trý árini, skipað fyri einum stórum og fevnandi tiltak í Østrøm í Havn. Men í ár verður tað øðrvísi!

Hóast ætlanin var, at hátíðarhalda dagin sum vant, men hesu ferð í Perluni og á Reinsarínum í Tórsgøtu, mugu vit ásanna, at tað ikki er ráðiligt, nú korona farsóttin aftur ger um seg í Føroyum. Fleiri teimum sum luttaka á degnum eru fakfólk innan heilsu- og almannaøkinum, og tað eru júst tey, sum eru um teimum borgararum, sum vit í løtuni mugu ansa eyka væl aftir, ikki gerast sjúk av COVID-19.Vit harmast sjálvsagt um støðuna, men vit síggja, at okkara systurfeløg uttanlands hava tikið somu atlit, og vit ynskja so best ber til, at fylgja tilmælinum frá heilsumyndugleikunum. Tað meta vit ikki ber til, um vit savna omanfyri 500 fólk hendan dagin, sum vant.

***

Í staðin skipa vit fyri eitt spennandi talgild tiltak, og skráin er klár!

Tiltakið byrjar kl. 19 og verður stroymt á Facebook og Youtube!

Orðstýrari verður Liljan Weihe.

Kl. 19: Róa Midjord, forkvinna í Sinnisbata, bjóðar vælkomin og gevur orðið til orðstýraran.

Kl. 19:05 Elsebeth Mercedes Gunnleysdóttir, landsstýriskvinna í Almannamálum, sigur nøkur orð.

Kl. 19:10 Sofaprát við Asger Kristian Eið Karinarson. Um tað at fáa eina diagnosu og liva sum vaksin við ADD.

Kl. 19:40 Tónleikainnslag við SWAY.

Kl. 19:55 Fyrilestur við Jákup Boga Joensen: "Tá sálin fjøtrað var".

Kl. 20:15 Sofaprát við Rudi Køhnke um tað at liva við angist. Rudi er danskur sjónleikari og millum annað kendur frá høvuðsleiklutum í "Fidibus" og "Fuglefangerens søn", har hann spælir føroyingin Esmar.

Kl. 20:40 Tónleikainnslag við JASMIN.

Kl. 20:55 Ársins sálarheilsuvirðisløn verður handað av landsstýrismanninum í Heilsumálum, Kaj Leo Holm Johannesen.

Kl. 21:00 Forkvinnan takkar fyri og tiltakið endar.

Vit gleða okkum at “síggja” tykkum!

LauraApol_Sinnisbati

Hvør skal hava ársins sálarheilsuvirðisløn 2020?

Hevur tú eitt uppskot til hvør skal hava ársins sálarheilsuvirðisløn?

Sinnisbati fer fyri fjóðru ferð, í sambandi við Altjóða Sálarheilsudagin 10. oktober, at handa eina Sálarheilsuvirðisløn til ein einstakling ella bólk.

Almenningurin, einstaklingar og feløg fáa við hesum høvi at skjóta upp, hvør hevur hendan heiður uppibornan.

Endamálið við eini slíkari Sálarheilsuvirðisløn er, at heiðra ein ella fleiri, sum hava gjørt eitthvørt átak, tiltak ella annað, sum á serligan hátt hevur varpað ljós á sálarheilsu, og gjørt eitt arbeiði fyri at bøta um og/ella arbeiða sálarheilsu fremjandi. Høvi er til at skjóta einstaklingar og bólkar upp, vísandi til tiltøk, sum verða framd kring alt landið.

Øll kunnu tilnevna, hvør skal hava Sálarheilsuvirðislønina. Ein dómsnevnd ger síðani av, hvør skal hava heiðurin av at fáa fyrstu Sálarheilsuvirðislønina, út frá innkomnu uppskotunum.

Virðislønin verður handað á Altjóða Sálarheilsudegnum, sum í ár verður taldild á Facebook og Youtube.

Uppskot kunnu sendast Sinnisbata á sinnisbati@sinnisbati.fo í seinasta lagi týsdagin tann 6. oktober á middegi.