Kategori: Tíðindaskriv

Samrøðubólkur

Bólkur fyri ung, ið kenna ótta og angist, byrjar eftir summarfrítíðina

Posted on by Sinnisbati
Í næstum byrjar ein nýggjur sjálvhjálparbólkur fyri ung yvir 18 ár, ið kenna ótta og angist. Hetta er næstuferð, at Sinnisbati bjóðar sjálvhjálparbólk út til ung við ótta og angist. Undirtøkan og afturmeldingarnar fyri seinasta bólk vóru sera góðar. Tí bjóða vit tilboðið aftur.

 

 

Eg havi havt ein dag, har eg havi kunnað fortalt, lurtað, grátið og flent. Tað hevur sannført meg um, at eg ikki eri einsamøll.

 
Um bólkin

Í sjálvhjálparbólkinum fáa luttakandi møguleika at hitta onnur ung, ið eru í líknandi støðu, og kunnu deila tankar, kenslur og royndir saman. Luttakararnir fara saman við bólkaleiðara at fáa amboð til at lætta um kenslur av angist og ótta í gerandisdegnum.

Bólkurin byrjar 22. August, ella tá hann er fult teknaður. Luttakarar møtast 12 ferðir saman við bólkaleiðara, mánadagar millum kl. 16.00 og 18.00 í hølum í Tórshavn. Pláss er fyri 8 luttakandi í bólkinum.

Bólkurin er skipaður í samstarvi við Vivian Sjóðklett og Kunstterapi.fo. Vivian Sjóðklett, sum fer at leiða bólkin, er útbúgvin námsfrøðingur, kunstterapeutur og kynslívsfrøðingur. Vivian nýtir millum annað amboð innan kunstterapi og mindfulness. Eingi krøv ella ávísir førleikar eru neyðugir fyri at kunna luttaka í bólkinum – einans at tú ert yvir 18 ár.

Luttakarar og bólkaleiðari eru áløgd tagnarskyldu eftir galdandi reglum.
Tað er ókeypis at luttaka í bólkinum, men avmarkað pláss er.

 

Melda til

Tilmeldingin fer fram við at skriva ein teldupost til Sinnisbati@Sinnisbati.fo. Einans starvsfólk hjá Sinnisbata og bólkaleiðari síggja tína tilmelding. Við at melda teg til, loyvir tú Sinnisbata og bólkaleiðara at seta seg í samband við teg viðvíkjandi luttøku.

 

Øll eru vælkomin at venda sær til Sinnisbata við spurningum á telduposti ella við at ringja á 597913.

Ávísing ella diagnosa er ikki neyðug fyri at luttaka í bólkunum hjá Sinnisbata. Tilboðið er eins væl ætlað at virka fyribyrgjandi.

Samrøðubólkur

Gangið í mínum skóm

Posted on by Sinnisbati

 

Átakið 'Gangið í mínum skóm' verður fyrstu ferð 12. juni í samband við Tórshavn Marathon. Endamálið við átakinum er at varpa ljós á sálarsjúku, og hvussu tað kann kennast at liva við sjúkueyðkennunum; í hesum førum við tunglyndi, angist og skizofreni.

Um tú luttekur til Tórshavn Marathon sunnudagin 12. juni, so fert tú møguliga at síggja fólk við gulum ballónum og faldarum - hetta eru starvsfólk hjá Almannaverkinum og Sinnisbata. Vit fara at býta faldarar út við eini QR-kotu á, og við at skanna QR-kotuna, fært tú atgongd til trý ljóðbrot um tunglyndi, angist og skizofreni. Ljóðbrotini skulu ímynda, hvussu tað kann kennast at liva við hesum sjúkueyðkennum á egnum kroppi og sinni. Tú kanst lurta ímeðan tú rennur ella gongur, og fáa eina uppliving av, hvussu avbjóðandi tað kann vera at ganga nakrar metrar við sálarsjúku.

GG* Ljóðbrotini kunnu kennast ógvuslig og vekja neiligar kenslur og minnir. Kjattráðgevingin hjá Sinnisbata er opin hvørt kvøld kl. 20.00-22.00 á Sinnisbati.fo

 

Stutt um diagnosurnar:

Tunglyndi

Tunglyndi er ein av teimum mest útbreiddu sálarsjúkunum. Fimti til sætti hvør persónur hevur ella fer at fáa sjúkueyðkenni fyri tunglyndi eina ferð í lívinum. Øll kunnu blíva rakt av sjúkuni, ung sum gomul. Orsakirnar til tunglyndi kunnu vera ógvuliga ymiskar. Summi av sjúkueyðkennunum kunnu vera: dapurskygni, kenslan av vónloysi, møði og manglandi orka í longri tíð, umframt lítil til ongin lívshugur. Tað verður bólkað sum lætt, moderat og tungt tunglyndi.

Angist (ótti)

Kenslan av ótta er ein natúrlig reaktión uppá eina uppliving av vanda, og hon tryggjar at vit handla skjótt. Í summum førum er tann natúrliga reaktiónin nógv størri enn tað, ið vandin krevur. Tá er talan um patologiskan ótta. Tað eru nógv stig av ótta, t.d. frá lættum nervøsiteti til deyðsótta, og tað eru ymisk sløg av ótta, t.d. sosialfobi, panikótti og generaliseraður ótti.

Skizofreni

Skizofreni kann ávirka tankar, kenslur og sansir. Ofta byrja sjúkueyðkennini fyri skizofreni í ungdómsárunum. Í sambandi við sálarsjúkuna kann ein uppliva sjúkueyðkennini: ranghugsan, apati og hallusinatiónir, t.d. at hoyra røddir. Skizofreni vísir seg ymiskt frá persóni til persón. Summi hava áhaldandi psykotisk sjúkueyðkenni, meðan onnur sleppa av við tey psykotisku sjúkueyðkennini.

Átakið er eitt samstarv ímillum Almannaverkið og Sinnisbata.

 

Hoyr ljóðbrotini longu nú, við at trýsta á leinkjurnar niðanfyri:

Tunglyndi: https://soundcloud.com/user-923866353/tunglyndi-1?utm_source=clipboard&utm_medium=text&utm_campaign=social_sharing

Angist: https://soundcloud.com/user-923866353/otti?utm_source=clipboard&utm_medium=text&utm_campaign=social_sharing

Skizofreni: https://soundcloud.com/user-923866353/skizofreni-1?utm_source=clipboard&utm_medium=text&utm_campaign=social_sharing

 

Ella við at skanna QR-koturnar:

Samrøðubólkur

Sinnisbati móttikið stuðul

Posted on by Sinnisbati

Alt vikuskiftið hevur Norðurlandahúsið verið karmur um FO TATT FEST. Til festivalin hevur uppboðsøla verið av málningi, sum Livar Nysted hevur málað, og í dag endaði sølan. Málningurin varð seldur fyri 20.000 krónur, og allur peningurin verður latin til arbeiðið hjá Sinnisbata.

Vit í Sinnisbata takka mangar ferðir fyri stuðulin, og eru vit sera rørd av hesi flottu gávu. Allur stuðul ger stóran mun í okkara arbeiði.

Vit vilja takka fyriskiparunum av Fo Tatt fest, Livari Nysted og keyparanum av málninginum.

Samrøðubólkur

Sinnisbati 40 ár

Posted on by Sinnisbati

Týsdagin tann 24. mai fyllir Sinnisbati 40 ár. Tað eru nú 40 ár liðin, síðani stovnandi aðalfundin hjá Sinnisbata í 1982, har stig varð tikið til at stovna felag, sum skuldi arbeiða fyri fólki við sálarsjúku, og avvarðandi teirra.

Vit vilja fegin hátíðarhalda dagin saman við tykkum, og skipa í hesum sambandi fyri almennum føðingardegi og bókaútgávu í Reinsarínum.

Í samband við føðingardagin gevur Sinnisbati, saman við Sprotanum og Grækaris Djurhuus Magnussen, bók út um søguna hjá felagnum. Til tiltakið verður bókin løgd fram, og prát verður við Grækaris um bókina. Prát verður eisini við tvey av fólkunum í nýggju bókini, ið hava myndað felagið og føroysku sálarsjúkusøguna. Møguleiki verður eisini fyri at keypa bókina hetta kvøldið.

Umframt hetta, vísir Sinnisbati Ung ein nýggjan stuttfilm fram, og Herborg Torkilsdóttir kemur at spæla eitt nýtt lag fyri okkum.

Øll eru hjartaliga vælkomin. Sinnisbati bjóðar føðingardagskøku og kaffi.

 

Leinkja til tiltakið á Facebook: https://www.facebook.com/events/309229121368761?ref=newsfeed

Samrøðubólkur

Gunnhild Persson er nýggjur aðalskrivari í Sinnisbata

Posted on by Sinnisbati

Gunnhild Persson

Gunnhild Persson er sett í starv sum aðalskrivari í Sinnisbata. Hon tók við starvinum 1. apríl 2022.

Gunnhild Persson er 27 ára gomul, býr í Tórshavn og er útbúgvin innan politikk og umsiting. Gunnhild hevur gott innlit í føroyskar áhugafelagsskapir og hevur fleiri ára royndir í nevndararbeiði. Hon hevur eitt breitt innlit í føroysk samfelagsviðuskifti og politisku skipanina.

8 umsóknir komu inn til starvið sum aðalskrivari í Sinnisbata.

Gunnhild fer sum aðalskrivari í Sinnisbata at hava ábyrgd av dagligu umsitingini og samskipan av størri verkætlanum og tiltøkum, umframt átøkum og kunningararbeiði. Harafturat fer hon at arbeiða við limarøkt og fundraising.

Samrøðubólkur

Aðalskrivari til Sinnisbata

Posted on by Sinnisbati

Vilt tú vera við til at menna og standa á odda fyri Sinnisbata, áhugafelag teirra, ið hava sálarsjúku og avvarðandi teirra í Føroyum? Eitt áhugavert, mennandi og avbjóðandi starv sum aðalskrivari hjá Sinnisbata er leyst at søkja.

Um Sinnisbati

Sinnisbati er ein sjálvboðin áhugafelagsskapur hjá teimum, ið hava sálarsjúku og avvarðandi teirra. Hvønn dag arbeiða vit fyri at bøta um korini hjá teimum, umframt at kunna um sálarsjúku og skipa fyri átøkum, sum kunnu lætta um gerandisdagin hjá teimum við sálarsjúku og avvarðandi teirra.

Starvið

Vit kunnu bjóða tær eitt spennandi, áhugavert og avbjóðandi starv, har tú hevur stóra ávirkan á virksemi í felagnum. Saman við nevndini hevur tú ábyrgd av øllum virkseminum í felagnum. Virksemið í felagnum er nógv økt síðstu árini, og økist støðugt. Hetta krevur, at tú ert førur fyri at hava nógvar bóltar í luftini samstíðis uttan at missa yvirlitið.

Sum aðalskrivari arbeiðir tú við:

– At hava ábyrgdina av at avgerðir hjá nevndini verða framdar í verki.

– At kanna møguleikar fyri at fremja ynskjum hjá nevndini.

– At økja um inntøkurnar hjá felagnum.

– At hava samband og samskifti við MEGD, myndugleikar, samstarvsfeløg og viðkomandi stovnar.

– At samskipa verkætlanir og tiltøk.

– At skriva kunningar- og tíðindaskriv, umframt hoyringsskriv og svar.

– At sita í arbeiðsbólkum, sum umboð fyri Sinnisbata.

Vit ynskja hesar førleikar:

– Tú ert eldhugaður og hevur kunnleika til psykiatriska økið.

– Tú hevur gott innlit í føroysk politisk- og samfelagsviðurskifti.

– Tú dugir væl at málbera teg á føroyskum.

– Tú hevur góð samstarvsevni og ert álítandi.

– Tú er fyrikomandi og sinnaður til at traðka fram í miðlum um neyðugt.

– Tú tekur stig til nýggj tiltøk og brúkar títt hugflog.

– Tú kanst arbeiða sjálvstøðugt.

– Tú hevur góðan telduførleika.

– Tú er struktureraður, hevur yvirlit og góðar fyrisitingarførleikar.

– Fyrimunur er, um tú hevur umsitingar- og leiðsluroyndir, tó ikki eitt krav.

Á skrivstovu felagsins arbeiðir eisini eitt skrivstovufólk 10 tímar um vikuna, umframt at fleiri sjálvboðin og fríyrkisstarvsfólk eru knýtt at felagnum. Hesi hevur aðalskrivarin dagligu ábyrgdina av.

Løn/setanartreytir

Starvið er normerað til 30 tímar um vikuna, starvsbrøkur 3/4. Starvssetanin er frá 1. apríl 2022 ella eftir nærri avtalu. Lønin er sambært sáttmála millum fíggjamálaráðið og avvarðandi fakfelag.

Meira fæst at vita um starvið við at venda sær til Lauru Apol, á tlf 597913 ella á teldupostinum sinnisbati@sinnisbati.fo Umsókn saman við prógvum, viðmælum v.m. skal sendast til Sinnisbata, umvegis teldupost til sinnisbati@sinnisbati.fo. Viðmerk “umsókn” á teldupostin.

Umsóknarfreistin er 22. mars 2022 kl. 12:00. Meira kunning um arbeiðið hjá Sinnisbata kann finnast á heimasíðu felagsins: www.sinnisbati.fo

Samrøðubólkur

Nýggj nevnd er vald

Posted on by Sinnisbati

(Frá vinstru: Joan Pousen, Elisabeth Carlsson, Súsanna Olsen, Oda Jóhansdóttir, Margretha Poulsen, Erla Matras Jensen og Rannvá Dam Thomsen. Vivian Sjóðklett og Súsanna Herdalur Tausen).

22. februar var ársaðalfundin í Sinnisbata hildin í MEGD-húsinum á Íslandsvegi 10C í Tórshavn.

Súsanna Olsen, forkvinna, legði fram sína formannsfrágreiðing, har hon legði dent á stóra virksemið, ið hevur verið seinasti árið, hóast virksemið hevur verið rakt av korona. Hon takkaði fyri stóra vælvildin og stuðulin, ið felagið upplivdi, tá Sinnisbati saman við KRIS, høvdu stóra sjónvarpsinnsavningartiltak í Kringvarpinum 6. novembur 2021.

Formannsfrágreiðing og ársfrágreiðing frá skrivstovuni, verður í næstum teldutøk á heimasíðuna.

Nýggj nevnd bleiv á fundinum vald, og fleiri takkaðu fyri seg. Millum onnur Tummas Thomassen, ið hevur verið virkin í Sinnisbata í nærum 30 ár. Vit takka honum fyri alt tað hann hevur givið og verið fyri felagið. Hansara arbeiði hevur gjørt stóra mun gjøgnum øll hesi árini. Vit vilja somuleiðis takka Elin Hansen fyri hennara arbeiði seinasti árini, nú hon ikki stillaði upp aftur.

Vit bjóða trý nýggj anlit vælkomin: Joan Poulsen, Elisabeth Carlsson og Rannvá Dam Thomsen.

Á fyrstu nevndarfundinum, 1. mars, skipaði nevndin seg soleiðis:

  • Súsanna Olsen, afturvald sum forkvinna
  • Oda Jóhansdóttir, afturvald sum 2. næstforkvinna
  • Erla Matras Jensen, afturvaldursum 2. næsforkvinna
  • Súsanna Herdalur Tausen, vald sum nevndarskrivari og kassameistari
  • Vivian Sjóðklett, nevndarlimur
  • Rannvá Dam Thomsen, nevndarlimur
  • Joan Pousen, tiltakslimur
  • Elisabeth Carlsson, tiltakslimur

Nevndin er til reiðar at fara til verka við eitt nýtt og spennandi nevndarár, har nógv áhugavert virksemi er á skránni. Millum annað fyllir Sinnisbati 40 ár 24. mai.

Meira verða at frætta leypandi á heimasíðu felagsins og á Facebook-síðuni hjá felagnum

Samrøðubólkur

Alment skriv: Hvar vilja tit spara?

Posted on by Sinnisbati

Fyri nøkrum mánaðum síðani fegnaðust vit. Vit fingu kunning um, at landsstýrismaðurin í Heilsumálum ynskti at raðfesta psykiatriina við tveimum milliónum afturat á komandi fíggarlóg, har vit fingu lovað meira útgreining, viðgerð og bráfeingishjálp. Tvær millónir er ikki nógv og tað er ikki nokk. Eisini langt frá, men tað er eitt jaligt og rætt stig rætta vegin. Vit fegnaðust, tí smáu sigrarnar skulu vit eisini fegnast um, meðan vit ganga móti stóra málinum - at psykiatriska økið fær eins stóra viðurkenning og rúmd sum likamliga sjúkraøkið.

Men tá álitið hjá fíggjarnevndin kom, fingu vit ein skelk. Har vóru ætlaðir sparingar í sjúkrahúsverkinum, í Almannaverkinum, til barnavernd og felagsskapir, ið ger fyribyrgjandi og viðgerðandi arbeiði. Vit vóru ørkylað og fyrsti tankin var “men HVAR skal so ítøkiligt sparast?”. Tí merkir tað í roynd og veru, at hasar tvær milliónirnar, ið vit fingu lovað til uppraðfesting av psykiatriini ikki koma kortini?

Seinasti árið hevur Sinnisbati fingið eitt methøgt tal av áheitanum. Omanfyri 1.000 áheitanir eru komnar inn, og satt at siga, er tað ringt at fylgja við og náa at viðgera øll innkomin mál. Nógv mál snúgva seg um avvarðandi, ið kenna seg ráðleys í skipanum, har teirra kæru, ið eru rakt av sinnisligum avbjóðingum, ikki kennast møtt á nóg góðan ella virðiligan hátt. Eisini eru metnógvar áheitanir frá ungum, heilt niður í 11  ár, ið stríðast innaní, men sum ikki kenna á seg, at tey hava eitt stað at fara við teirra tonkum og kenslum. Tað kunnu, mugu og skulu vit ikki góðtaka!

Spara tit nú, fáa tit eina avbera stóra eykarokning seinni, sum okkara børn og ungu koma at gjalda, umframt øll tey, ið longu nú hvønn dag stríðast við sinnisligum sjúkum og avbjóðingum, og avvarðandi teirra.

Vit heita staðiliga fíggjarnevnd Føroya Løgtingsins um at hugsað langsigtað og síggja støðuna í síni heild.

Viðurkenning er loysnin, ikki fantom-sparingar.

/Sinnisbati

Samrøðubólkur

Hevur tú hug at ráðgeva og hjálpa fólkum, ið hava avbjóðingar?

Posted on by Sinnisbati

Ert tú ein av okkara nýggju ráðgevum?

Seinasti tvey árini hevur Sinnisbati bjóðað talgilda ráðgeving til borgarar. Ráðgevingin hevur verið væl vitjað og avbjóðingarnar hjá fólki, sum hava vent sær til ráðgevingin, hava verið sera fjølbroyttar. Felags fyri allar samrøðurnar hevur verið, at talan eru um menniskju, ið hava tað trupult, og tað ger, at tey hava tørv á ráðgeving og vegleiðing. Flestu samrøðurnar eru ein ráðgevingarsamsrøða, meðan nakrar eru afturvendandi. Øll, sum venda sær til ráðgevingina, kunnu verða dulnevnd, eins væl og ráðgevarnar eru tað.

Kjatt-ráðgevingin er opin hvørt kvøld frá kl. 20-22, og er at finna á www.sinnisbati.fo.

Vit leita eftir fleiri ráðgevum til okkara toymi, sum er mannað við dugnaligum fakfólkum innan ymisk yrkisøki, t.d. námsfrøði, misbrúkviðgerð, psykoterapi, sálarfrøði og sosialar ráðgeving.

Talan er um eitt toymi av óløntum ráðgevum.

Les meira um talgilda ráðgeving hjá Sinnisbata á www.sinnisbati.fo. Har ber eisini til at finna hagtøl og nærri greining av teimum avbjóðingum tey, ið skriva inn, dragast við.

Vit vænta:

  • at tú hevur heilsu-, námfrøðiliga ella sosialfakliga útbúgving. Onnur við viðkomandi royndum innan líknandi ráðgeving eru vælkomin at søkja. Lesandi innan heilsu, námfrøðiliga ella sosialfakliga útbúgving eru vælkomin at søkja.
  • at tú hevur viðkomandi starvsroyndir innan ráðgeving og vegleiðing av fólki.
  • at tú hevur gott innlit í samfelagsviðuskifti og psykiatri.
  • at tú hevur góðar førleikar innan skriftligt samskifti, tí tað ofta hevur stóran týdning, at viðkomandi, sum skrivar, fær skjótt svar.
  • at tú hevur góðar menniskjaligar førleikar og ynskir at vera og gera nakad gott fyri onnur.
  • at tú ikki hevur drigist við sálarliga sjúku seinastu tvey árini (viðgerð/innleggingarkrevjandi).
  • at tú kann taka mininum eina ráðgevingarvakt á 2 tímar um vikuna.

Vit bjóða:

  • Eitt mennandi og avbjóðandi sjálvboðið starv
  • Góða upplæring í talgildari ráðgeving
  • Sálarlig fyrstuhjálparskeið
  • Loypandi supervisjón
  • Góðar og lærurík royndir til framtíðarstørv

Umsókn og freist:

Ljóðar hetta spennandi, og er hetta nakað fyri teg? So er at senda tína umsókn til sinnisbati@sinnisbati.fo, har tú hjáheftir prógv og lívsrensl.

Freistin at søkja sjálvbodnu ráðgevingarstørvnini er mánadagin 3. januar 2022 á miðdegi.  Starvssamrøður verða hildnar í viku 2, 2022.

Hevur tú spurningar til sjálvbodna ráðgevingarstarvið, kjatt-ráðgevingina ella til Sinnisbata, ber til at seta seg í samband við Lauru Apol, aðalskrivari, á teldupost laura.apol@sinnisbati.fo.