Aftur í ár verður skipað fyri Altjóða Sálarheilsudagin 10. oktober.
Set kross í kalendaran 10. oktober til ein spennandi dagur har sálarheilsa verður í miðdeplinum!
Skrá verður lýst seinni 🙂
—
Tiltakið verður í Østrøm í Tórshavn 10. oktober kl. 13 til 18.
Ólavsøkaaftan tann 28. juli frá klokkan 14 til 18, skipar Sinnisbati fyri kafé í hølinum á Laðabrekku 1 í Tórshavn.
Vit selja kaffi, te, køku og vaflur.
Eisini ber tað til, hjá børnum, at mála sítt egna ólavsøku flagg.
Somuleiðis ber til at keypa “vesi”-armband, sum er galdandi frá klokkan 14-18.
Tað verður hugnaligasta vesi-køin í Havn 😀
Allur stuðul fer beinleiðis til Sinnisbata, sum arbeiðir fyri at bøta um korini hjá fólki við sálarsjúku og avvarðandi teirra.
—
VIT SELJA LUTASEÐLAR Á ÓLAVSØKU! 
😀
Vit ganga runt í Havn og selja lutaseðlar á ólavsøku. Prísurin er 25 kr. pr. stk.
Nógvar góðar vinningar eru!
Nøkur av teimum, ið hava valt at stuðla, eru m.a.:
– Rib62
– Umami
– Eta
– Gómagott
– Silvursnið
– Trin27
– Norðlýsið sightseeing
– Suðringurin
– Útilív
– Irish Pub
– Hvonn
– The Tarv
– Frumbiti
– Café MorMor
– Árstíðirnar
– Conrad
– Akkuleya
– Javnvág v/Mariannu Simonsen
– Køtlum
– Jógvan Weihe
– Niels L. Arge
– Mia H. Smith stuðlar við einum málningi
Tá tú hevur keypt lutaseðlar frá Sinnisbata, stuðlar tú einum góðum endamálið.
Stuðulin fer óskerdur til arbeiðið hjá felagnum, sum arbeiðir fyri at bøta um korini hjá fólki við sálarsjúku og avvarðandi teirra.
HEVUR TÚ VUNNIÐ?
Á ólavsøku kanst tú á heimasíðu felagsins www.sinnisbati.fo kanna, um tú hevur vunnið 
🙂
Laura Apol, aðalskrivari felagsins fer í farloyvi frá 1. juli fram til 1. juli 2019
Laura hevur seinasta árið starvast á skrivstovuni hjá Sinnisbata í Laðabrekku í Tórshavn, sum aðalskrivari, har hon hevur haft ábyrgd av dagligu umsitingini, samskipað tiltøk, verkætlanir og annað virksemi í felagnum í samstarv við nevndina í felagnum.
Komandi mánaðirnar fer Laura at gera sítt spesiali í stjórnmálafrøði liðugt, og í september fer hon í barsilsfarloyvi. Eftir ætlan kemur Lauru aftur í starvið 1. juli 2019.
Frá 1. august verður nýggjur aðalskrivari settur í farloyvisstarv hjá Sinnisbata. Freistin at søkja starvið er 1. juli 2018 á middegi. Nærri kunning kann lesast á heimasíðu felagsins www.sinnisbati.fo.
Tilmæli til Sirið Stenberg, landsstýriskvinnu í Heilsu- og Innlendismálum
Nógv átøk og menningartiltøk mugu gerast fyri at skapa eina tíðarhóskandi og nøktandi psykiatri, sum kann rúma og nøkta allan tørvin, sum er og sæst í samfelagnum.
Fylgjandi eru tilmæli og tilgongdir, sum Sinnisbati metir eru átrokandi og neyðug at fremja í verki skjótast til ber.
Vegna nevndina í Sinnisbata.
Pk. 1)
Tilbúgving til skaðastovu
Alneyðugt er við einari tilbúgving til verandi skaðastovu, soleiðis at eisini fólk við sálarligum avbjóðingum og órógvi, kunnu fáa ta neyðugu hjálpina, sum hesum fólkunum tørvar og um innlegging verður neyðug.
Hetta er ein afturvendandi trupulleiki, sum limirnir í Sinnisbata koma við, og sum má loysast, soleiðis at fólk við sálarligum avbjóðingum kunnu fáa nøktandi og neyðugu hjálpina skjótast til ber. Í løtuni er mannagongdirnar soleiðis, at viðkomandi, ið hevur sálarligt órógv og tørvar hjálp, oftast má seta seg í samband við egnan kommunulækna fyri at blíva vístur til viðgerð á psykiatriska deplinum. Hetta er ein ov seinur máti at tryggja sær rættu hjálpina uppá, og er ikki nøktandi fyri tey fólkini, sum hava tørv á at fáa akutta hjálp – um tað er hjá teimum, ið hava sálarsjúku ella avvarðandi teirra.
Tá tosað verður um tilbúgving, er møguligt at eftirútbúgva verandi psykiatrisku sjúkrasystrar, sum fáa eyka útbúgving í bráðfeingismóttøku o.a. viðkomandi fyri økið og eitt slíkt tilboð.
Pk. 2)
Liðiligari skipan: ískoyti til sálarfrøðing
Í kunngerðini um fíggjarligt ískoyti úr Heilsutrýgd til sálarfrøðiliga viðgerð hjá privatstarvandi sálarfrøðingi, Kunngerð nr. 150, eru nýggju punkt, sum skulu uppfyllast fyri at ískoyti verður latið. Mett verður, at kunngerðin í ov stóran munn leggur upp til hjálp, tá fólki eru blivin sjúk, ella hava upplivað álvarsamar avleiðingar. Sálarfrøðilig viðgerð má sostatt eisini veitast sum bráðfeingis viðgerð, soleiðis at tørvur ikki er ápsykiatriskari viðgerð og heilivági.
Mælt verður til at lætta um krøvini at fáa ískoyti úr Heilsutrygd til sálarfrøðiliga viðgerð, soleiðis at fólki við lættari trupulleikum kunnu fáa ískoyti til sálarfrøðiliga viðgerð.
Pk. 3)
Bráðfeingislinja
Neyðugt er við einari bráðfeingislinju, sum eru tøk alt samdøgrið. Fólk, ið hava sálarligt órógv og sjúku, hava ofta brúk fyri onkrum at lurta eftir sær, eitt stað, har ein kann finna sær hjálp, eisini tá kommunulæknin ikki er tøkur. Við einari slíkari linju, kunnu innleggingar, tungir tankar og sjálvmorðsroyndir fyribyrgjast. Á henda hátt ber til at fyribyrgja innleggingum og psykiatriskari viðgerð. Eitt slíkt tilboð kann knýtast at longu eksisterandi tilboðum í sivilsamfelagnum ella verða knýtt at deplinum/skaðastovnuni.
Pk. 4)
Sosialráðgevar knýtast at Psykiatriska depil
Hóskandi hevði verið, um sosialráðgevar vóru knýttir at arbeiðinum hjá deplinum. Har kunnu teir veita patientunum, sum standa fyri at blíva útskrivaðir, hjálp, soleiðis at patientarnir verða kunnaðir og vegleiddir í at koma út aftur og virka í samfelagnum aftaná innlegging. Við einum slíkum tilboði ber til at geva patientum teir neyðugu upplýsingarnar um búðstaðarviðuskifti, arbeiðsmarknaðarviðuskifti, útbúgvingarviðuskifti, økispsykiatri, umframt onnur tilboð, sum stovnar og felagsskapir veita, sum kann verða við til at bøta um umstøðunar hjá viðkomandi, tá hann/hon ikki er í innlegginarkrevjandi viðgerð. Harumframt mugu tilboð vera um innleggingar- og útskrivingarsamrøður, har avvarðandi eisini hava møguleiki fyri at koma við. Somuleiðis mugu útskrivingarmannagongdir gerast, somuleiðis við at uppfyljgandi samrøður/viðgerð mugu veitast.
Pk. 5)
Økispsykiatri sum ein natúrligur partur útskrivingini
Í løtuni eru mannagongdirnar soleiðis, at tað eru starvsfólkini á psykiatriska deplinum, sum skulu vísa patientinum til økispsykiatriina. Mælt verður til, at økispsykiatriin verður knýtt at útskrivaðum patientum frá fyrsta degi uttan mun til ávísing, soleiðis at patientarnir fáa hóskandi tilboð og uppfylging so skjótt sum viðkomandi ikki longur er innleggingarkrevjandi.
Pk. 6)
Økispsykiatri kring alt landið
Tilboðið um økipsykiatri má víðkast um alt landið. Økispsykiatri er eitt gott og neyðugt tilboð, sum má veitast til allar borgarar í landinum, soleiðis at fólk við sálarligum avbjóðingum og órógvi fáa neyðugu hjálpina og viðgerð uttan mun til, hvar tey búgva í landinum. Økispsykiatriin ger eitt megnar arbeiði í at veita upplýsing og at fáa røttu hjálpina til teirra, sum hava brúk fyri henni, soleiðis at framtíðar innleggingar kunnu fyribyrgjast. Sostatt má tilboðið víðkast út um alt landið.
Pk. 7)
Mentorskipan
Í Sinnisbata uppliva vit í størri og størri mun, at brúk er fyri vegleiðing og stuðli í mun til tað at hava eina sálarsjúku. Somuleiðis er brúk fyri mentorum, sum kunnu vegleiða og stuðla teimum avvarðandi, soleiðis at tey avvarðandi framhaldandi kunnu veita sínum avvarðandi, sum hava sálarligt órógv ella sjúku, stuðul og umsorgan. Ein mentorskipan við sjálvbodnum og løntum mentorum hevði verið ein góð og berandi stuðulsloyns fyri tey, ið hava brúk fyri hesum.
Pk. 8)
Viðgerð til tey, ið krevja viðgerð
Tað er týdningarmikið, at tey, ið krevja viðgerð, sleppa í viðgerð. Sostatt er neyðugt, at hesi fólkini ikki verða útskrivað vegna plásstrot. Tað er alneyðugt, hava pláss fyri teimum, ið enn krevja viðgerð, soleiðis at tey ikki verða útskrivað og innløgd skjótt aftanáaftur. Í løtuni síggja vit, at avvarðandi og patientar upplivað hesar trupulleikarnar sum eina neiliga ringrás, sum ikki hevur nakran enda.
Pk. 9)
Javnsett millum tað likamliga og sálarliga
Ein afturvendandi og átrokandi trupulleiki er, at tað sálarliga heilsuøkið ikki verður raðfest líka sum tað likamliga heilsuøkið, sjálvt um gransking vísir, at við góðari sálarheilsu og fyribyrging ber til at sleppa undan fleiri likamligum sjúkum. Hetta er ein trupulleiki, sum sæst aftur fleiri staðni í samfelagnum, og ein støða, sum vit bara í felag kunnu broyta. Hetta er eitt mál, sum ikki kann endurtakast nóg ofta, tí avleiðingarnar av manglandi politiskari raðfesting og í samfelagnum sum heild, eru sera stórar, álvarsomar og ikki minst vaksandi. Tískil má tað sálarliga økið javnsettast við tað likamliga.
Pk. 10)
Hóskandi karmar
Betri karmar mugu tryggjast í psykiatriska depilinum. Bæði fyri patientar og starvsfólk. Gongd er komin á at byggja ein nýggjan depil, og hetta má ikki draga meira út, enn longu er. Sjálvt um starvsfólkini vilja vera við, at vánarliga karmarnar ikki skulu forða fyri, at har verður veitt eitt gott og nøktandi arbeiði og at bjóðað verður út góð og gevandi tilboð, so mugu vit tíverri staðfesta, at verandi karmar hvørki eru nøktandi ella góðir at virka undir. Ikki bara fyri starvfólkini, men eisini fyri patientin. Hetta er eitt mál, sum ikki kann berast fram nóg ofta, tí raðfestingin má fremjast í verki, og greitt má verða fyri politisku skipanini, at arbeiðið við fyribils loysnum ikki má blíva til verandi og framhaldandi loysnin. Undantaksstøðan, sum vit vilja kalla verandi karmar á Psykiatriska deplinum, má ikki blíva til nakað vit góðtaka sum eina varandi loysn.
Pk. 11)
Uppdeiling í mun til aldur, á psykiatriska deplinum
Hóskandi er ikki, at børn og vaksin eru innløgd saman. Ein verandi og góð loysn má finnast uppá hendan trupulleikan, tí tørvurin á viðgerðum eru ymiskir fyri hesar patientbólkar. Um loysn ikki kann finnast, má metast um, hvørt nýggj loysn uttanfyri Psykiatriska deplin má finnast, so at børn og vaksin innløgd fáa nøktandi karmar og tilboð at virka undir.
Pk. 12)
Trot á læknum og psykiatrarum
Ikki er tað nøktandi við bert einum psykiatara í Føroyum, umframt einum barna- og ungdómspsykiatara, ið ikki býr í landinum og tískil ikki kann nøkta allan tørvin. Vit mugu fáa fleiri serlæknar innan sálarliga økið til Føroya.
Pk. 13)
Eftirlit við tilboðum
Eftirlit við tilboðum hjá privatum og almenum aktørum mugu setast í verk, so vit tryggja, at fólk við sálarligum avbjóðingum og avvarðandi fáa ta viðgerðina, sum er teimum best, og at tilboðini verða góðskutryggjað. Psykiatrisk tilboð skulu fevna um fleiri møguleikar og bjóðast av fleiri fakbólkum, men eitt eftirlit má verða við, um tilboðini er dygdargóð. Nógv størri dentur má vera á, hvussu góð ávirkanin er av viðgerðini, vit geva, enn hvussu nógv vit hava viðgjørt.
Eingin máting av hesum spurningunum og ávirkanini av psykiatriini er í Føroyum í dag, men eina slíka skipan ber til at seta á stovn við verandi servitan í Føroyum. Evidens í psykiatriini umframt á sosiala økinum er eitt rák, sum er vaksandi, men eftirlit má verða við um tilfeingið verður nýtt rætt í mun til tað úrslitið, sum sæst hjá patientum úti í samfelagnum og á stovnum. Eftirlýst verður somuleiðis meira gjøgnumskygni í hvussu nógvar innleggingar eru, um tað er fyrstu ferð fólk eru innløgd, hvat eru fólk innløgd fyri, og hvussu nógv tvang er á deildini o.s.fr. Soleiðis ber til at gera eftirmetingar og brúka tølini sum hagtøl til heilsugransking.
Sinnisbati hevur fyrrapartin í dag sent skriv til Sirið Stenberg, landsstýriskvinna í Heilsu- og Innlendismálum og Eyðgunn Samuelsen, landsstýriskvinna í Almannamálum viðvíkjandi frágreiðingina frá Løgtingsins Umboðsmanni (LUM) sum bleiv almannakunngjørd tann 25. juni 2018, viðvíkjandi umstøðunum hjá børnum, sum verða innløgd á Psykiatriska depilin.
Í skrivinum vil felagið Sinnisbati minna á týdningin av, at frágreiðingin verður tikin í alstørsta álvara, soleiðis, at vit í Føroyum ikki hava børn og ung sum detta niður ímillum, men fáa tað hjálp teimum tørva.
Til dømis verður har sambært frágreiðingini hjá LUM mælt til, at børn ikki verða innløgd saman við vaksnum, tí tørvurin ikki er tann sami hjá børnum sum hjá vaksnum. Hetta er ikki fyrstu ferð, at avvarðandi landsstýrisfólk verður upplýst um hetta.
Í 2016 handaði Sinnisbati landsstýriskvinnuni í Heilsu- og Innlendismálum á fundi eitt tilmæli við 13 punktir, har felagið millum annað vísti á, at tað ikki er hóskandi at børn og vaksin eru innløgd saman, tí tørvurin á viðgerðum eru ymiskir fyri hesar patientbólkar. Somuleiðis vísti Sinnisbati á, at um loysn ikki kann finnast, má metast um, hvørt nýggj loysn uttanfyri Psykiatriska deplin má finnast, soleiðis at børn og vaksin sum eru innløgd fáa nøktandi karmar og tilboð at virka undir.
Eisini í juli í fjør sendi Sinnisbati eitt bræv til landsstýriskvinnuna í Heilsu- og Innlendismálum, har viðmerkingar vóru til frágreiðingina LUM tá kom við viðvíkjandi ónøktandi umstøðurnar á psykiatriska deplinum. Har bleiv somuleiðis víst á manglandi arbeiðsorkuna í mun til barna- og ungdómspsykiatriska økið.
Sjálvt um batar eru komnar í, er tað er als ikki nóg gott. Somuleiðis má tað ONGANTÍÐ vera tað fíggjarliga sum er orsøk til tess. Vit mugu og skulu hjálpa okkara ungum her á landi á best møguligan hátt, soleiðis at tey seinni kunnu vera við til at styrkja um samfelagið.
Vit vilja sum felag stuðla undir atfinningunum sum LUM kemur fram til í sína frágreiðing, sum bleiv kungjørd fyrradagin. Longu í ár hevur Sinnisbati met í áheitanir viðvíkjandi børn og ung undir 18 ár, sum hava sálarligar líðingar at stíðast við. Frá januar í ár til og við dags dato, hava vit fingið ikki færri enn 17 áheitanir inn frá avvarðandi og stovnar, sum hava tørv á hjálp og kunning. Sigast skal, at Sinnisbati ofta er har borgarar venda seg til seinast – ofta tá tey hava roynt aðra staðni.
Í skrivinum sent landsstýriskvinnunar fyrrapartin í dag, verður somuleiðis skrivað:
”Tað ber ikki til, at játtanin til økið ikki er nøktandi, og at har ferð aftaná ferð eru undanførslur frá myndugleikum. Hetta er eitt øki, sum vit sum samfelag ikki hevur ráð til at undirraðfesta. Enn einaferð víst til tilmælið, sum Sinnisbati handaði landsstýriskvinnuni á fundi í Heilsu-og innlendismálaráðnum 25. oktober 2016, vilja vit sum stendur í punkt 9, vísa á tydningin av, at sálarliga økið verður javnsett við somatiska økið tá talan er um játtanir og tað neyðugu hjálpina.”
Um ikki neyðugu tilboðini er til taks í Føroyum, so er tað neyðugt at finna hjálpina og tilboðini aðrastaðnis, eitt nú uttanlands. Sjálvt um vit sum felag helst høvdu ynskt, at tilboðini vóru at fáa í Føroyum, mugu vit ásanna, at so er ikki í løtuni í fleiri førum, sum eisini Almannaverkið og Psykiatriska depilin hava víst á í viðmerkingarskrivum sent út alment 25. juni 2018 og 26. juni 2018.”
Við skrivinum vil Sinnisbati innarliga heita á ovastu mynduleikar landsins, at taka frágreiðingina hjá Løgtingsins Umboðsmanni í størsta álvara, og veruliga lurta eftir serfrøðingum á økinum, sum rópa varskó, og hyggja innat – hava vit ráð til at børn og ung detta niður ímillum og ikki fáa nøktandi hjálpina, soleiðis at tey aftur kunnu virka í samfelagnum á jøvnum føtum við øðrum? Svarið er einfalt, nei.
Vegna nevndina í Sinnisbata, vil eg biðja um umbering fyri fleiri misskiljingum, sum vóru í tíðindaskrivinum, felagið sendi út 24. juni um kvøldið við sonevnda “Øksamálinum”. Eitt nú er tað ikki rætt, at tann eini sum er dømdur í málinum er dømdur forvaring – hann er dømdur eina viðgerðadóm, har hann kann fáa røttu hjálpina fyri sína sálarsjúku. Eisini er tað ikki rætt, at psykiastriski depilin í 2011 boðaði frá, at tey ikki kundu viðgerða unga mannin, sum hevur sálarsjúku. Hetta eru sekundær upplýsingar, vit hava frá miðlunum, men sum ikki eru rættar, og tað er sera harmligt, at byggja omaná pástandir, sum ikki eru rættar – tað vil felagið biðja um umbering fyri. Tá tað er sagt, stendur Sinnisbati við, at málið er sera syrgiligt, og at vit høvdu ynskt, at tann ungi maðurin, sum víst verður til, hevði fingið meira hjálp. Somuleiðis vóna vit, at eitt slíkt mál ikki verður endurtikið, tí tað er syrgiligt hjá øllum pørtum.
Tað er ørkymlandi at hoyra, at eitt ungt menniskja er dømt til forvaring í eitt óavmarkað tíðarskeið.
Psykiatriski depilin gjørdi longu í 2011 vart við, at tey ikki vóru før fyri at viðgera viðkomandi persón. Í 2017
hendi nakað vanlukkuligt og í juni 2018 fall dómurin í sokallaða “Øksamálinum”. Á síðulinjuni sita fólk, sum
eru avvarðandi, tann sum hevur verið fyri ágangi, viðgerðar og røktarfólk, og spyrja hvussu hetta kundi
henda?
Sinnisbati er fegin um avgerðina, at vit í Føroyum ikki senda okkara psykiatrisku sjúklingar av landinum
longur, og slettis ikki ung undir 18 ár. Tað er so jaligt, at vit eru farin burtur frá hesum, og taka ábyrgd fyri
okkara egnu, sum hava sálarsjúku her á landi.
Tó vita vit eisini, at á teimum flestu depilunum á LSer ikki gjørligt at bjóða allar serviðgerðir, og hetta er
eisini galdandi á psykiatriska deplinum, ella eind undir Almannaverkinum, ið varðar av fólki við sálarsjúku..
Tað sum undrar okkum í Sinnisbata er, hví hesin ungi maður, sum longu í 2011 fekk akutta álvarsama
sálarsjúku staðfesta, ið krevur serðviðgerð, ikki hevur fingið ta hjálp honum tørvar, eins og aðrir
bráðfeingins sjúklingar her á landi, tey seinastu 7 árini. Vit senda fólk til viðgerðar á Ríkissjúkrahúsinum og
aðrastaðni uttanlands fyri hundraðtals milliónir árliga, og henda upphæddin veksur alsamt. Ungi maðurin,
sum í Føroya Rætti er dømdur, hevur verið álvarsama sjúkur í 7 ár ella meira. Í staðin fyri at senda hann (í
øllum førum nakað av tíðini) hagar hann kundi fingið skikkaða langtíðar psykiatriska viðgerð, verður
maðurin viðgjørdur í eini skipan, sum í hesum føri vísir seg ikki at hava megnað tað rættiliga.
Ein kundi eisini spurt, hvat vilja vit her á landi við okkara heilsuverki og almannaverki – um so sjúkir
tannáringur, og ein nú ungur maður ikki kann fáa alla ta hjálp honum tørvar? Vit í Sinnisbata vilja fara so
langt, sum at spyrja: “Hava hesir stovnar og allir aðrir viðkomandi føroyskir myndugleikar fingið eina skøvu í
sín legitimitet og spælt fallit her?” At hjálpa hesum unga manninum er sjálvsagt kjarnuuppgávan og tað
vælferðartænasturnar og viðkomandi almennu stovnarnir eru til fyri.
Ein sera óheppin avleiðing av slíkari hending, sum mann kundi sloppið undan, eru, at allir fordómar, tabu
og stigma, ið Sinnisbati sum áhugafelagsskapur arbeiðir við at basa, fáa eitt ordans bakkast. Hóast massivar
lýsingarherferðir uttanlands og her heima um at sálarsjúka er eins fjølbroytt og ófarlig fyri samfelagið og
nærsambond, og somatiskar sjúkur, fær skarpan gang . Hetta málið hevur við sær, at nógvir fordómar og
fávitska blussa upp aftur, og fólk blíva varin og bangin fyri fólki við sálarsjúku. SO sjúkur, sum hesin maður
er og hevur verið, er tíbetur rættiliga sjáldsamt, og er ein evarska lítil partur av hópinum, sum hava
viðgerðarkrevjandi sálarsjúku.
Tá ið gongdin í málinum er kannað og eftirmett til botns vóna vit í Sinnisbata, at hetta ongantíð hendir aftur
í Føroyum. Vit vóna somuleiðis, at sjúklingar við so álvarsligari sálarsjúku á jøvnum føti við aðrar sjúklingar
fáa skjóta og nútímans bráðfeingis viðgerð, ið teimum tørvar, og verða vard ímóti at gera skaða á seg
sjálvan og onnur.
Hetta skriv er ein áminning og innilig áheitan til okkara politiska vald um at uppraðfesta, serliga játtan til teir
stovnar, ið eru nevndir omanfyri, og seta tann pening av, sum er realistiskur og nøktandi til tilbúgvingar,
røkt og viðgerð av ungum fólki, sum hava álvarsama sálarsjúku.
Nevndin í Sinnisbata
Vilt tú vera við til at menna og standa á odda fyri Sinnisbata, áhugafelag teirra ið hava sálarsjúku og avvarðandi teirra í Føroyum?
Eitt áhugavert, mennandi og avbjóðandi farloyvisstarv sum aðalskrivari hjá Sinnisbata er leyst at søkja.
Um Sinnisbata
Sinnisbati er ein sjálvboðin áhugafelagsskapur hjá teimum, ið hava sálarsjúku og avvarðandi teirra. Hvønn dag arbeiða vit fyri at bøta um korini hjá hesum fólkum, umframt at kunna um sálarsjúku og skipa fyri átøkum, sum kunnu lætta um gerandisdagin hjá teimum við sálarsjúku og avvarðandi teirra.
Starvið
Vit kunnu bjóða tær eitt spennandi, áhugavert og avbjóðandi starv, har tú fer at hava stóra ávirkan á virksemið í felagnum. Tú fer, saman við nevndini, at hava ábyrgd fyri øllum virkseminum í felagsskapinum. Virksemið í felagnum er nógv økt síðstu árini, og økist framyvir. Hetta krevur, at tú ert før/ur fyri at hava nógvar bóltar í luftini samstundis – uttan at missa yvirlitið.
Sum aðalskrivari arbeiðir tú m.a. við
– At hava ábyrgdina av at avgerðir hjá nevndini verða framdar í verki.
– At kanna møguleikarnar fyri at fremja ynskini hjá nevndini.
– At økja um inntøkurnar hjá felagnum.
– At hava samband og samskifti við MEGD, myndugleikar, samstarvsfeløg og viðkomandi stovnar.
– At samskipa verkætlanir og tiltøk.
– At skriva kunningar- og tíðindaskriv.
– At sita í arbeiðsbólkum, sum umboð fyri Sinnisbata.
Vit ynskja hesar førleikar
– Tú hevur eldhuga fyri og kunnleika innan psykiatriska økið.
– Tú hevur gott innlit í føroysk politisk- og samfelagsviðurskifti.
– Tú dugir væl at málbera teg á føroyskum.
– Tú hevur góð samstarvsevni og er álítandi.
– Tú er fyrikomandi og sinnað/ur at traðka fram í miðlum um neyðugt.
– Tú er jalig/ur fyri at taka stig til nýggj tiltøk og brúka títt hugflog.
– Tú kann arbeiða sjálvstøðugt.
– Tú hevur góðan telduførleika.
– Tú er strukturerað/ur, hevur yvirlit og góðar førleikar fyri fyrisiting.
– Tað er ein fyrimunur, um tú hevur umsitingar- og leiðsluroyndir, tó ikki eitt krav.
Løn/setanartreytir
Starvið er eitt hálvtíðarstarv. Vit vænta, at tú kanst byrja í starvinum í seinasta lagi 1. august 2018.Lønin verður ásett sambært avtalu.
Meira fæst at vitað um starvið við at venda sær til Lauru Apol, á tlf 597913 ella sinnisbati@sinnisbati.fo
Umsókn saman við prógvum, viðmælum v.m. skal sendast til Sinnisbata, umvegis teldupost til sinnisbati@sinnisbati.fo. Viðmerk “umsókn” á teldupostin.
Umsóknarfreistin er 1. juli 2018
GG! Talan er um eitt barnsburðarfarloyvisstarv frá 1. august 2018 til 1. juli 2019.
Meira kunning um arbeiðið hjá Sinnisbata kann finnast á heimasíðu felagsins: www.sinnisbati.fo
Árið 2017 hevur verið eitt sera virkið ár hjá Sinnisbata
Í januar byrjaðu vit av álvara at kanna um grundalag var fyri eini headspace-verkætlan her heima hjá okkum í Føroyum. Laura Apol varð boðin til Danmarkar á fund í tveir dagar saman við umboðum úr Íslandi og Belgia. Kunnað varð um headspace í Danmark, hvussu tey arbeiða, mannagongdir og kanningar. Somuleiðis vóru umboðini eisini á vitjan hjá tveimum headspace sentrum. Einum í Keypmannahavn og tí í Helsingør. Nógv kom burturúr og eitt samstarv kom í lag, har Laura sum samskipari í Føroyum, skuldi kanna møguleikarnar fyri einum headspace sentri í Tórshavn, og kanna møguleikarnar fyri fíggjarligum stuðli í samstarvi við headspace Danmark.
Tað var eisini síðst í janaur. at tilmælið ”Borgarin takast uppá ráð” varð handað landsstýriskvinnuni í Almannamálum, Eyðgunn Samuelsen. Tilmælið er grundalagið undir einum nýggjum tænastupolitikki, har borgarar við serligum tørvi eru í miðdeplinum. Umboð úr Sinnisbata hava eisini sitið í arbeiðsbólkinum. Tænastupolitikkurin er liður í arbeiðinum at dagføra lóggávuna viðv. tænastum. Tænastupolitikkurin bleiv lagdur fyri Løgtingið til aðalorðaskiftis á heysti 2017.
Árið 2017 var eisini árið, har vit fingu eina talgilda limagjaldsskipan, har longu nógvir limir hava teknað seg, men eisini limir, sum fyrr hava goldið sjálvi, eru komir inn á við at nevndin hevur ringt runt til limirnar. Hetta hevur gjørt, at vit hava fingið umleið 10.000 kr. inn í limagjøldum í 2017. Hetta er sjálvandi als ikki nokk. Í 2018 má eitt stórt stig takast fyri at fáa fleiri limir at gjalda og fáa fleiri limir sum heild. Harundir eisini fyritøkur.
Í 2017 fingu vit somuleiðis hægri játtan á fíggjarlógini, nú fáa vit sum felag 400.000 kr., har vit áðrenn fingu 200.000 kr. Hetta fegnast vit um. Tað hevur millum annað haft við sær, at vit kunnu gera fleiri avvarðandi tilboð, seta eitt starvsfólk og brúka meira orku uppá upplýsing.
22. februar var startskotið til, at ein stórur arbeiðsbólkur skuldi arbeiða við einum áliti um eina heildarætlan fyri psykiatriska økið í Føroyum. Í bólkinum vóru vit í Sinnisbata eisini umboðað. Hetta hevur verið eitt stórt og avbjóðandi arbeiði, men spennandi og neyðugt. Hetta arbeiðið var liðugt í heyst 2017. Komandi tíðina koma vit at hoyra nógv meira um innihaldið og implementeringina av átøkunum í álitinum.
1. mars bleiv Laura Apol sett í starv sum aðalskrivari í Sinnisbata í 10 tímar um vikuna. Frá 1. juli bleiv tímatalið hækkað upp í 20 tímar. Hon tekur sær av dagligu umsitingini í felagnum, fundraisar, umboða felagið í arbeiðsbólkum og samstørvum og er við til at samskipa og skipa fyri tiltøkum.
4. mars 2017 var ársaðalfundur, har Súsanna Olsen takkaði fyri seg eftir fýra ár sum forkvinna í felagnum. Róa Midjord tók við sum forkvinna. Fleiri nýggj andlit gjørdust ein partur av nevndini, og eisini bleiv samtykt at seta Lauru Apol sum starvsfólk í felagnum til at taka sær av dagliga samskiftinum, stuðli, størri tiltøkum, og sjónligheit sum heild.
18. mars høvdu vit eitt ørðvísi tiltak. Nevniliga loppumarknað. Nógvar loppur komu inn og omanfyri 13.000 kr. vórðu savnaðar til headspace-verkætlanina, umframt barna-og ungdómsarbeiðið hjá felagnum. Eitt sera stuttligt og hugnaligt tiltak, har nógv fólk vitjaðu.
Aftur í 2017 høvdu vit avvarðandibólkar. Um várið fyri vaksnum og fyri ungum (Time Out) um heystið. Tað hevur verið væleydnað, og afturmeldingarnar eru góðar. Somuleiðis hevur Føroya Skótahjálp savnað 70.000 kr. inn til Time Out, sum verður brúkt til endamálið í 2018.
Eitt lítið video um at tosa við virðing um fólk við sálarsjúku bleiv eisini gjørt í 2017, og tað bleiv væl móttikið.
Í apríl høvdu vit vitjan av Toke Zandersen úr Danmark Hann var við á kafékvøldi við heitinum ”Vón og recovery”. Kafékvøldini vóru á Sandi, í Havn og á psykiatriska deplinum. Í Havn spældi Ragnar Finsson nøkur løg.
1. mai bleiv Sólmai sett í arbeiðsroynd hjá okkum, og hevur virkað sum skrivstovufólk á kontórinum saman við Lauru. Tað hevur eydnast væl, og vit hava øll verið glað fyri at hava Sólmai sum arbeiðsmegi, drívmegi og blítt anlit í Sinnisbata, altíð til dystin fús.
24. mai 2017 hevði Sinnisbati 35 ár á baki. Føðingardagshald var 27. mai í Perluni. Har vóru røður, fyrilestrar, tónleikur og sofuprát. Ein spennandi og fjølbroytt skrá. Um kvøldið, 27. mai, var stuðulskonsert í Reinsarínum, har nógvir kendir tónleikarar og bólkar spældu og stuðlaðu Sinnisbata á henda hátt. Umleið 25.000 kr. komu inn í stuðli til barna- og ungdómsarbeiðið hjá felagnum.
14. juni vóru vit við á ítrottardegnum hjá Almannaverkinum. Ein vátur, men góður dagur við nógvum góðum fólkum og lekkrum døgurða. Tað er sera týdningarmikið, at vit sum felag eisini koma út kring landið og hitta borgararnar, har sum tey eru. Tað eydnaðist væl, og vit burdu so avgjørt verið við aftur í 2018.
Sama dag vóru vit við til at hátíðarhalda at viðgerðaheimið fyri ung, Frælsi á Eiði, lat upp. Tað er Frelsunarherurin undir leiðslu av Martini Kúrberg, sum hevur staðið á odda. Eitt sera flott og neyðugt stig. Vit góvu teimum eina gávu, eitt borðspæl, sum tey sikkurt kunnu fáa nógva gleði av.
Frá 1. juli til 15. august høvdu vit summarferiu, men kortini hendu fleiri ting. Vit vóru til dømis í húsunum hjá okkum á Dalavegnum og ruddaðu út í julimánaði. Eitt stórt og neyðugt arbeiði. Vit gleða okkum at kunna fara í holt við at umvæla húsini.
Í 2017 hava vit eisini verið úti og rópt varskó. Til dømis í sambandi við, at vit enn eina ferð vilja síggja, at politikararnir raðfesta psykiatriska økið hægri og at har skal takast væl og virðiliga hond um karmarnar úti á psykiatriska deplinum. Nógv er gjørt higartil, men slættis ikki nokk. Pjøssing er ikki loysnin. Tað eru virðiligir karmar og sømdir at virka undir har úti. Hetta var serliga í samband við átalu frá løgtingsins umboðsmanni í julimánaði.
24. august vóru vit til framløgu í Smæruni um sálarheilsu hjá miðnamskúlanæmingum í Føroyum. Tað var ein kanning, sum sálarfrøðingarnir á miðnámi høvdu gjørt. Tilmælið var millum annað um, at eitt opið ráðgevingartilboð til ung hevði verið eitt gott hugskot. Tí vóna vit, at vit fáa vælvild til headspace í 2018.
Umboð úr Sinnisbata vóru við á ráðstevnu í Norðurlandahúsinum um kynsligan ágang, seksualitet og brek (Bryt tabút). Ein spennandi og neyðug ráðstevna um eitt øki, sum tíanverri ikki er væl lýst í Føroyum. Tað var Sig frá og Almannamálaráðið saman við Nordisk Velfærdscenter, sum stóðu fyri ráðstevnuni.
Í september gjørdust vit partur av ABC fyri sálarliga heilsu hjá Fólkaheilsuráðnum. Ein verkætlan sum skal virka sálarheilsufremjandi við trimum beinum, at vera virkin, at vera saman og at vera hugbundin. Har eru fleiri stovnar, feløg og myndugleikar sum eru partar av samstarvinum. Laura er ABC-samskipari í Sinnisbata, men Sólmai hevur eisini verið við á fundum. Hetta samstarvið heldur áram í 2018 við eini meira ítøkiligari virkisætlan hjá felagnum.
Í heyst vóru vit boðin við á samstarvsfund hjá SSP í Føroyum. Har vóru fleiri aktørar sum arbeiða fyri at bøta um sálarheilsuna hjá teimum ungu í Føroyum. Meira verður sikkurt at frætta um hetta samstarvið í 2018.
6. oktober vóru Laura og eg (Róa) við á Psykiatritoppfundi í Keypmannahavn. Tað var sera gevandi og vit fingu fleiri hugskot til víðari arbeiði.
10. oktober høvdu vit afturvendandi tiltakið, Altjóða Sálarheilsudagur. Í 2017 bleiv tað eitt nógv størri tiltak enn áður. Fleiri stovnar og feløg vóru boðin við sum samstarvsfelagar. Har vóru: Gigni, Dugni, Blái Krossur, Reyði Krossur, Fólkaheilsuráðið, Kringvarp Føroya (Røddin), Almannaverkið, KRIS, Fountainhúsið, psykiatriski depilin, Heilsurøktarafelagið og Rachel’s Vineguard. Tað bleiv eitt stórt tiltak í Østrøm í Havn, har fleiri fyrilestrar og tónleikur vóru. Har vóru eisini básar, har fólk kundu fáa kunning um feløg og stovnar. Hugsanin aftanfyri var at skapa eina heildarmynd av psykiatriska økinum á øllum økjum, ikki bara í mun til viðgerð. Har vitjaðu omanfyri 500 fólk ígjøgnum dagin. Sum nakað nýtt handaðu vit fyrstu sálarheilsuvirðislønina til ein ella fleiri, sum hava gjørt nakað serligt í mun til sálarheilsu. Tað bleiv Martin Kúrberg sum fekk heiðurin. Ein teknikapping fyri børn var eisini. Vinningurin var eitt gávubræv á 500 kr. til BR-leikur.
Sum nakað nýtt lótu vit í novembur 2017 upp á skrivstovuni. Tað er fyrsta hósdag í hvørjum mánaði, og tað hevur higartil eydnast væl. Fólk hava havt møguleiki at fáa eitt prát og ein drekkamunn. Tað verður vónandi møguligt at halda fram við hesum í 2018.
14. november vóru vit í Hvalvík og tóku ímóti einum kekki frá Skótahjálpini. Vit eru sera takksom fyri at føroysk børn hava savnað inn till onnur føroysk børn, sum hava foreldur við sálarsjúku. Tað er gott, at dentur verður lagdur á hesi viðurskifti.
19.-20. novembur høvdu vit tvey ung umboð við á fyrsta norðurlendska ungdómstoppfundinum í Keypmannahavn. Tað var Det Sociale Netværk sum hevði tikið stig til hetta. Umleið 40 ung úr øllum Norðurlondum vóru savnað, og eitt politiskt tilmæli varð gjørt, sum bleiv lagt fram í Fólkatinginum. Í næstum er ætlanin eisini, at tað skal leggjast fram her í Føroyun,
3. desember luttóku vit á Altjóða Brekdegnum, sum MBF skipaði fyri í Løkshøll í Runavík. Eitt sera spennandi og gevandi átak, har landsstýrisfólk og onnur vitjaðu.
14. desember var almennur jólahungni í hølunum hjá Sinnisbata. Har vóru fleiri fólk á vitjanTey fingu gløgg, holukøkur og kliptu jólapynt. Ein sera hugnalig løta.
15.-17. desember vóru tvær ungar gentur sendar til Svørikis á ráðstevnu um ung og sálarheilsu. Tað var átakið Gabriel Klint sum stóð fyri hesum. Sinnisbati varð boðin, eftir at tvey umboð høvdu vitjað okkum her í Føroyum, og høvdu prátað við føroysk ung. Endamálið er at varpa ljós á ung og teirra viðurskifti, tankar og kenslur. Genturnar fingu báðar nógv burturúr teirra luttøku á ráðstevnuni.
Í 2017 fingu vit stuðul til at byrja ein mannfólkabólk fyri menn, sum eru avvarðandi. Bólkurin fer í gongd í februar 2018. Somuleiðis hava vit fingið stuðul til eina barnabók um at vera barn hjá einum foreldri við sálarsjúku. Hon er júst komin út og kann eisini keypast her í kvøld. Alt yvirskotið frá søluni fer óskert til Sinnisbata.
Men 2017 var eisini árið har miðlarnar sum ongatíð áður hava varpað nógv ljós á sálarheilsu og sálarheilsufremjandi arbeiði. Tað fegnast vit sera nógv um, tí tað merkir eisini, at okkara arbeiði ger mun. Vit eru saman við øðrum aktørum við til at seta okkara limir og teirra umstøður meira á breddan. Hetta mugu vit syrgja fyri heldur áfram.
Loppumarknaður verður í Sinnisbata 24. mars kl. 10-14 í hølunum hjá felagnum, Laðabrekka 1 í Tórshavn, omanfyri handlinum Hennara, beint við Café Natúr.
Í ár verður savnað inn til avvarðandiarbeiðið hjá Sinnisbata. Vit hava seinasta árini skipað fyri avvarðandibólkum fyri vaksin, børn og ung, og hetta arbeiðið/tilboðið ynskja vit at víðka.
Hevur tú loppur, tú hevur hug at lata til endamálið, so ber til hjá tær at koma oman í Sinnisbata við lutum mikukvøldið 21. mars og hóskvøldið 22. mars millum kl. 17-19. Vinarliga boða frá áðrenn á telefon 597913 ella á sinnisbati@sinnisbati.fo, har tú sigur frá, hvat fyri lutir, tú hevur hug at lata til endamálið.
Tombola, og kaffi og køkusøla verður.
GG! Vinarliga hav við reiðan peningi! Allir pengar fara óskerdir til avvarðandiarbeiðið hjá felagnum!