Forfatter: Sinnisbati

SInnisbati á ferð

Sinnisbati hevur fingið nýggja nevnd

Posted on by Sinnisbati

Mikukvøldið 21. februar var árligi aðalfundurin hjá felagnum Sinnisbata, áhugafelag teirra, ið hava sálarsjúku og avvarðandi teirra.

Forkvinna Róa Midjord helt eina formansrøðu, sum kann lesast á heimasíðu felagsins, sinnisbati.fo.

Róa tosaði millum annað á, at 2017 hevur verið eitt sera virkið ár fyri Sinnisbata bæði so og so. Vit hava verið í fleiri arbeiðsbólkum og skipað fyri fleiri stór tiltøk eitt nú 35 ára føðingardagshaldi, sum var 27. mai í Perluni og í Reinsarínum um kvøldið.

“10. oktober høvdu vit afturvendandi tiltakið, Altjóða Sálarheilsudagur. Í 2017 bleiv tað eitt nógv størri tiltak enn áður. Fleiri stovnar og feløg vóru boðin við sum samstarvsfelagar. Har vóru: Gigni, Dugni, Blái Krossur, Reyði Krossur, Fólkaheilsuráðið, Kringvarp Føroya (Røddin), Almannaverkið, KRIS, Fountainhúsið, psykiatriski depilin, Heilsurøktarafelagið og Rachel’s Vineguard. Tað bleiv eitt stórt tiltak í Østrøm í Havn, har fleiri fyrilestrar og tónleikur vóru. Har vóru eisini básar, har fólk kundu fáa kunning um feløg og stovnar. Hugsanin aftanfyri var at skapa eina heildarmynd av psykiatriska økinum á øllum økjum, ikki bara í mun til viðgerð. Har vitjaðu omanfyri 500 fólk ígjøgnum dagin. Sum nakað nýtt handaðu vit fyrstu sálarheilsuvirðislønina til ein ella fleiri, sum hava gjørt nakað serligt í mun til sálarheilsu. Tað bleiv Martin Kúrberg sum fekk heiðurin.”

 

Á aðalfundinum bleiv nýggj nevnd bleiv vald, og hevur skipað seg soljóðandi:

Róa Midjord: Forkvinna

Marjun J. Hentze: næstforkvinna

Tummas Tomassen: Kassameistari

Súsanna Olsen: Nevndarlimur

Ragnar Petersen: Nevndarlimur

Erla Matras Jensen: Nevndarlimur

Beinta Victoria Sigvardsen Hentze: Nevndarlimur

Tiltakslimir í felagnum gjørdust: Vida Akselsdóttir Højgaard, Margreta Poulsen og Sofie Buchhave.

Jana Mortensen, Anna Nolsøe Joensen, Olga Maria undir Skarði og Regin Jóanesarson stillaðu ikki uppaftur. Vit takka stórliga fyri teirra arbeiði í nevndini.

Á myndini síggjast frá vinstru fremst: Marjun Hentze, Róa Midjord, Thomas Thomassen. Aftast frá vinstru: Margretha Poulsen, Erla Matras Jensen, Ragnar Petersen, Súsanna Olsen, Beinta Sivertsen Hentze og Vida A. Højgaard. 

SInnisbati á ferð

Tá mamma verður ør – Kafékvøld í Sinnisbata um at vera avvarðandi barn at foreldrum við sálarsjúku

Posted on by Sinnisbati

Mánakvøldið 12. mars kl. 19:30-21:30 verður aftur kafékvøld í Sinnisbata. Hesa ferðina viðgera vit evnið at vera avvarðandi barn at foreldrum við sálarsjúku.

Kristianna Dam, sum er sjúkrarøktarfrøðingur, námslektari á Sjúkrarøktarfrøðideildini og ph.d.-lesandi, kemur at greiða frá síni nýggju gransking um at vaksa upp við foreldrum við álvarsamari sálarsjúku. Eisini fer hon at siga sína hugsan um týdningin av, at tosað verður tíðliga við børn um sálarsjúkur, nú barnabókin sum Sprotin hevur givið út, ”Tá mamma verður ør” júst er komin út um sama evni.

Eisini Dagmar Clothier, sum er námsfrøðingur og bólkaleiðari í Time Out, avvarðandi bólkur fyri ung, í Sinnisbata, kemur at greiða frá arbeiðnum við børnum og ungum, sum eru avvarðandi, og tankarnar tey hava, og týdningin av, at tilfar er til taks, sum viðgerð eitt slíkt evni.

Høvi verður til spurningar og kjak.

Kaffimunnur og kaka verður at fáa.

Bókin ”Tá mamma verður ør” verður til keyps til serprís hetta kvøldið – einans 100 kr. Alt yvirskotið av søluni fer óskert til Sinnisbata og avvarðandiarbeiðið.

Øll eru vælkomin!

SInnisbati á ferð

“Tá mamma verður ør” – bókaframløgu í Reinsarínum, Orð og Tónar

Posted on by Sinnisbati

15. februar gevur Sprotin eina nýggja barnabók út, sum Laura Apol, aðalskrivari í Sinnisbata, hevur skrivað. Bókin snýr seg um at vera barn hjá einum foreldri við sinnis- og sálarsjúku. Tað skuldi, eftir tí sum sagt verður, verið fyrsta bókin av sínum slagi, sum er skrivað á føroyskum. Hon er ætlað børnum í barnagarðsaldri og yngstu flokkunum í fólkaskúlanum.

Bókin er somuleiðis skrivað sum eitt amboð hjá vaksnum at tosa við børn um hetta evnið, sum hjá nógvum tykist at vera torført at práta um og seta orð á. Bókin kann geva lesarunum fleiri orð at seta á tað at hava eina sinnissjúku, og hvussu tað kann kennast at vera avvarðandi.

Laura Apol er sjálv uppvaksin við eini mammu, sum var rættiliga illa fyri sinnisliga, og tí var tað natúrligt hjá henni at skriva eina barnabók um evnið. Hon vildi sjálv ynskt, at har var slíkt tilfar ætlað børnum og vaksum, tá hon var barn, tí eingin hjálpti við at seta orð á støðuna hjá henni og mammuni.

Bókin “Tá mamma verður ør”, kemur í bókahandlar kring landið frá 15. februar, og bókaframløga verður í Reinsarínum um kvøldið kl. 20, har Sprotin skipar fyri tiltakinum Orð og tónar.

Alt yvirskotið av søluni av bókini fer óskert til avvarðandiarbeiðið við børnum og ungum hjá Sinnisbata.

SInnisbati á ferð

Aðalfundur í Sinnisbata og spennandi fyrilestur um tvingsul í psykiatriini

Posted on by Sinnisbati

Við hesum verður kallað inn til árliga aðalfundin hjá Sinnisbata, mikudagin tann 21. februar 2018 kl. 19. Fundurin verður í hølum felagsins, Laðabrekka 1 í Tórshavn.

Dagsskrá sambært viðtøkum felagsins:

Aðalfundurin viðger hesi mál:

Val av orðstýrara

Ársfrágreiðing formansins

Grannskoðaðan roknskap fyri seinasta rakstrarár felagsins

Møguligar lógarbroytingar

Limagjald fyri komandi ár

Nevndarval

Val av grannskoðara

Ymiskt

Umframt vanligu dagskránna, verður spennandi fyrilestur um tvingsil í psykiatriini v/ Tórmórði Stórá.

 

Hevur tú hug at gerast partur av nevndini í Sinnisbata?

– kom og verð partur av einum spennandi og mennandi arbeiði!

Vit hava altíð tørv á góðum fólki, sum hava hug at vera við til at bøta um korini hjá teimum, ið hava sálarsjúku og avvarðandi teirra. Nevndin skipar saman við aðalskrivara felagsins fyri ymiskum kunnandi tiltøkum, sum til dømis árliga sálarheilsudagin 10. oktober og onnur upplýsandi tiltøk. Sum nevndarlimur hevur tú møguleiki fyri at umboða Sinnisbata á ráðstevnum í Føroyum og uttanlands, tú ert við til at mynda eitt virkið áhugafelag við nógvum fjølbroyttum uppgávum, og so ert tú við til at seta dagskránna á økinum og gera mun fyri nógv fólk, sum felagið hvønn dag varðar av. At vera nevndarlimur í Sinnisbata er spennandi, mennandi og avbjóðandi. Nevndarfund er 1 ferð um mánadin.

Sinnisbati hevur í løtuni eitt fast lønt starvsfólk, aðalskrivari felagsins, sum er sett hálva tíð. Umframt hetta hevur felagið eitt fólk í starvroynd nakrar tímar um vikuna. Hesi sita á skrivstovuni í Laðabrekku.

Øll eru hjartaliga vælkomin á gátt!

Vegna Sinnisbata

Róa Midjord, forkvinna

SInnisbati á ferð

Áheitarnarskriv: Virðiligar sømdir at virka undir

Posted on by Sinnisbati
Mynd: Álvur Haraldsen

Vit eru nú í fimtu viku av verkfallinum, og enn tykist eingin semja at vera í eygsjón millum Føroya Pedagogfelag, KAF og Fíggjarmálaráðið. Tað er spell. Ikki bara hjá teimum nógvu familjunum, sum eru raktar, tí børnini ikki sleppa á stovn. Hetta hevur eisini sera neiliga ávirkan á støðuna hjá borgarum við sálarsjúkum og kropsligum brekum, sum búgva heima og hava tørv á sosialpedagogiskari hjálp. Fleiri teirra hava antin ikki fingið vitjan ella í minni mun enn teimum tørva. Tað er ofta nærum einasta samband hesir borgarar hava regluliga við umheimin, og vandin fyri afturstigi í teirra viðgerð er størri, jú longri tíð gongur uttan tann stuðul tey hava tørv á.

Somuleiðis eru mong, ið búgva á sambýlum og búfelagsskapum, eisini rakt av verkfallinum. Tey fáa ikki ta hjálp teimum tørvar og eiheldur tann tryggleika, ið eitt slíkt búpláss eigur at hava við sær. Tað er týdningarmikið, at hava virðing fyri tí arbeiði, sum hvønn dag verður gjørt á hesum økinum, og tískil skulu starvsfólk, har undir námsfrøðingar, sjálvsagt hava virðiligar sømdir at virka undir. Tað er eingin loynidómur, at námsfrøðisliga arbeiðið er nakað av tí týdningarmesta vit hava í samfelagnum, um tað so snýr seg um arbeiðið við børnum, ungum, vaksnum við serligum tørvi ella eldri. Sinnisbati vil við hesum enn einaferð heita á partarnir um at koma aftur til samráðingarborðið og finna eina semju, sum tænir øllum pørtum best.

Vegna nevndina í Sinnisbata

 

SInnisbati á ferð

Nýtt tilboð: Avvarðandi bólkur fyri menn

Posted on by Sinnisbati
Sum nakað nýtt, verður avvarðandi bólkur fyri menn!

Ert tú, ella kennir tú ein, sum er avvarðandi at einum, sum hevur sálarsjúku? So er her eitt tilboð ætlað mannfólkum! Har er avmarkað pláss, so tað er um at tekna seg til sum skjótast. Freistin er 1. februar – har er eitt gjald uppá 300 kr.

Erling Fles, sálarfrøðingur, kemur at leiða bólkin, les meira um Erling her.

Nú er at tekna seg, tí avmarkað pláss er!

Avvarðandi bólkarn​i​r hjá Sinnisbata er​u​ bólkar, har umleið 6-10 avvarðandi møtast. ​Tey​ avvarðandi​ kunnu tosa opið og erligt um uppliving​ar​, trupul​leikar og kenslur, sum hava við teirra støðu sum avvarðandi at gera.

Bólkur fyri avvarðandi mannfólk.

Endamálið er:

– at møta monnum í líknandi støðu

– at læra hvussu ein kann handfara støðuna á ein gagnligan hátt

– at læra um avbjóðingar í mun til sálarligu støðuna hjá avvarðandi persóninum (psykoedukatión)

– at sleppa at seta orð á egnar tankar og kenslur í mun til egna støðu

Tað verður bygt upp við undirvísing, felagspráti, psykoedukatión og sosialum tiltøkum.

Freistin at tekna seg til er 1. februar 2018.

Les meira her.

SInnisbati á ferð

Áheitarnarskriv: Námsfrøðingar hava ein týðandi leiklut

Posted on by Sinnisbati

Til partarnar í lønarsamráðingunum millum Føroya Pedagogfelag, Kommunala Arbeiðsgevarafelag og Lønardeild Fíggjarmálaráðsins,

Sinnisbati vil við hesum heita á partarnar um at náa eini semju skjótast til ber.

Námsfrøðingar hava ein týðandi leiklut í at fáa eitt samfelag at hanga saman. Ikki bara í og við, at tey eru um, menna og taka sær av okkara børn á dagstovnunum, og eru við at mynda børnini sum menniskju, men eisini við at verða um borgarar við serligum tørvi.

Námsfrøðingar veita í fleiri førum umsorgan og tryggleika til eitt nú borgarar á sambýlum, bústovnum, sjálvsognarstovnum og øðrum, har tað ikki bara er týdningarmikið at námsfrøðingarnar sleppa at arbeiða – tað er eisini neyðugt. Eitt nú tá um ræður sambýli við borgarum við ringum sosialum avbjóðingum og sálarsjúkum, ber oftast ikki til hjá teirra kæru at vera um tey sum starvsfólkini eru. Hetta eru borgarar, sum eru serlig viðgerðar- og umsorganarkrevjandi, og tað eru námsfrøðingarnir, ið hava fakligu førleikarnar til at hjálpa teimum – eins og ikki øll hava avvarðandi, ið kunnu hjálpa.

Við einum ynski um skjóta semju millum partarnar og vælvild,

Nevndin í Sinnisbata

SInnisbati á ferð

Kom á altjóða brekdag í Løkshøll 3. desember

Posted on by Sinnisbati

Aftur í ár verður altjóða brekdagur hátíðarhildin í Føroyum. Hann verður í ár hildin í Løkshøll 3. desember kl. 14.30 til 16.30.

MBF skipar dagin og fær í ár spennnandi vitjan av dananum Jacob Nossell, sum síðan 2005 miðvíst hevur sagt frá, hvussu tað er at liva við avbjóðingum.

Jacob Nossell er fjølbroyttur persónur og hevur verið við á fleiri ymiskum pallum. T.d er hann kendur í Danmark fyri at tosa opið og erliga um lív sítt, og hetta ger hann serliga við ymiskum fyrilestrum og leikum, sum m.a. eru um tað at bera brek, um mentan og samfelagið sum heild. Nossell hevur t.d. verið við í tiltøkum hjá Det Centrale Handicapråd, Grøn Koncert og Københavns Kommune.

I 2013 gjørdi Jacob Nossell saman við Thomas Skov eitt upplýsandi átak, sum teir kallaðu ”Det er ikke et handicap” fyri Socialstyrelsen. Her kanst tú síggja eitt brot av “Det er ikke et handicap”.

Jacob Nossell var eisini ein av høvuðspersónunum í viðurkenda dokumentarfilminum “Naturens Uorden”, sum fyrstu ferð varð sýndur í oktober 2015. Filmurin er nú vístur fleiri enn eina millión ferðir um allan heim.

Her sært tú lýsing av Naturens Uorden.

Í 2016 varð eisini leikurin “Human Afvikling” sýndur á Det Kongelige Teater fyri fyrstu ferð. Hesin leikur hevur síðan tá fingið CPH Cultures Årets Særpris.

Her er leinki til lýsingina av Human afvikling.

Eisini hevur Jacob Nossell verið stigtakari til stomiguiden.dk, sum er vegleiðing fyri ung, ið liva við stomi.

Jacob Nossell arbeiðir dagliga sum sjálvstøðugur ráðgevi, har hann ráðgevur ymiskum felagsskapum og feløgum um ymiskar spurningar ella avbjóðingar á brekøkinum.

Jacob Nossell fekk í 2010 Spastikerforeningens Spastikerpris og í 2014  Vanførefondens Opmuntringspris.

Um tú vilt vita meira, kanst tú vitja heimasíðu hansara her: http://nossell.dk/

Foto: Christian Stæhr/Elsass Fonden.

Kelda: www.mbf.fo

SInnisbati á ferð

“Social Influence: Imitation and Conformity in Schizophrenia” – Ph. D. verja

Posted on by Sinnisbati

Arndis Simonsen vart ph.d. á Aarhus Universitet

Fríggjadagin 17. november vardi Arndis Simonsen, cand.psych., ph.d.-ritgerð sína á Aarhus Universitet. Ritgerðin er um hvussu fólk við skisofreni verða ávirkað av øðrum og hvønn leiklut hetta hevur fyri sjúkueyðkenni og sosiala førleikan. Ritgerðin kallast “Social Influence: Imitation and Conformity in Schizophrenia”

Ole Mors, professari á Psychosis Research Unit, iPSYCH, Institut for Klinisk Medisin, Aarhus Universitetshospital hevur verið høvuðsvegleiðari.

Hjávegleiðarar hava verið Andreas Roepstorff, professari, og Vibeke Bliksted, lektari, bæði á Aarhus Universitet og Daniel Campbell-Meiklejohn, seniorgranskari á School of Psychology, University of Sussex.

Í metingarnevndini vóru

Christine Parsons, lektari, Interacting Minds Centre, Institut for Klinisk Medisin, Aarhus Universitet, forkvinna og leiðari fyri verjuna

Jennifer Cook, granskari á School of Psychology, University of Birmingham

Leonhard Schilbach, granskari á Department of Psychiatry, Ludwig-Maximilians-Universität and Max Planck Institute of Psychiatry

Metingarnevndin segði í síni niðurstøðu um ritgerðina, at: ”The studies in this dissertation have been conducted to a high standard. A lot of thought has been put into designing/selecting experimental paradigms that tap into the core psychological process of interest without overly relying on additional processes that are not central to the research question…Miss Simonsen has also gone to great lengths to account for potential confounding factors in her analysis protocols…In short, the work in this thesis has been conducted to a high scientific standard… The committee agrees that this work represents an important contribution to our current understanding of social information processing in schizophrenia.”

Verkætlanin varð fíggjað av Lundbeckfonden, Psychosis Research Unit og Interacting Minds Centre.

Les um Arndis Simonsen í Heilagrunninum

Samandráttur

Social Influence in Schizophrenia

A new PhD project from the Psychosis Research Unit, Aarhus University, contributes to new knowledge about how people with schizophrenia are influenced by others and which potential consequences this has both on the characteristic symptomatology and their level of functioning. The project was carried out by Arndis Simonsen, who is defending her dissertation on 17/11.

We are constantly influenced by other people. Examples of this could be that we ask a friend for advice about what he/she would do in a given situation or that we follow changes in fashion. It is unclear whether the tendency to be influenced by others is altered in schizophrenia and whether a potential alteration would impact the symptomatology or the level of functioning. The aim of this project was to investigate how individuals with schizophrenia are influenced by others, both on a conscious and sub-conscious level, compared to healthy individuals. A range of cognitive tests were used to assess the susceptiblity to influence, for instance by measuring the participants’ tendency to imitate others’ movements or their tendency to change their opinions according to other people’s opinions. The study suggests that patients with schizophrenia are at least as susceptible to social influence as healthy individuals when it comes to sub-conscious processes. However, patients display difficulties when they consciously have to use information from others during decision making and this may contribute to the characteristic symptomatology and the social impairments, often accompanying the disorder.

Kelda: www.gransking.fo

SInnisbati á ferð

TORA VIT OG DUGA VIT AT SETA ORÐ Á? – spennandi tiltak

Posted on by Sinnisbati

Sjálvmorð, blóðskemd, harðskapur, kynslív, sjúka, deyði, etingarólag, politisk evni, brek og sálarsjúka. Tora vit nóg væl at seta orð á hesi truplu og torføru evni í barna- og ungdómsbókum – og duga vit? Bókadeild Føroya Lærarafelags fer at brúka ein tíma at seta bókmentafrøðingi, rithøvundi, ritstjóra og serfrøðingum henda spurning og tosa um bókina sum miðil og amboð og kjakast um, í hvønn mun vit kunnu og skulu seta orð á. Tiltakið verður í sambandi við Bókadagarnar 24. – 26. november í Norðurlandahúsinum.

Bókatímin er í tveimum pørtum. Fyrri parturin er tann bókmentaligi parturin, meðan seinni parturin er innspark frá felagsskapum, ið arbeiða millum fólk, ið hava eitthvørt tungt at bera. Snúningsásin er tó tann sami: Hvussu kann bókin vera ein hjálpari?

Marna Jacobsen, ritstjóri, hevur eina framløgu um bøkur, ið viðgera tung/tabu evni, sum eru komnar út á Bókadeildini tey seinastu 30 árini, har talið av slíkum bókum er vaksandi seinastu árini.

Henrietta Arge Jacobsen, sum hevur MA í føroyskum, fer at greiða frá um tílíkar bøkur í breiðari høpi. Henrietta hevur í ár hildið masterfyrilesturin Trupul og tung evni í myndabókum fyri børn. Eitt norðurlendskt rák eftir 2000.

Rakel Helmsdal, rithøvundur, fer at tosa um bókina, Hon, sum róði eftir ælaboganum, har Argantael hevur verið offur fyri umsorganarsvik sum barn, og sum m.a. viðger seksualitet: Hvør eri eg? Kann eg vera hugtikin av báðum kynum, ella er tað so trupult, at eg verði trýst út í tankar um sjálvmorð? Bókin var í uppskoti til Norðurlendsku barna- og ungdómsbókmentaprísin í ár.

Kathrina Lindenskov Holm, sálarfrøðingur greiðir frá og hugleiðir um, hvussu bøkur, tekstir ella tað at skriva kann hjálpa børnum og ungum, sum hava ymiskar trupulleikar. Eru barnabøkur amboð, sum verða nýtt í sálarfrøðiligari viðgerð?

Í 2011 gav Kvinnuhúsið út eina ævintýreskju, har trý ævintýr eru fyri børn, sum hava verið vitni til harðskap í familjuni. Hon er ætlað børnum, sum koma við mammum sínum í Kvinnuhúsið. Edda Hjartvarsdóttir fer at tosa um sínar royndir í Kvinnuhúsinum við børnum, og um Ævintýreskjan ger nakran mun eftir hennara tykki.

Berin er felagsskapur, sum er settur á stovn í 2002 við tí endamáli at skipa fyri sorgarbólkum fyri børnum og ungum, sum hava mist ein av sínum næstringum. Oddvør Poulsen fer at greiða frá, hví Berin eggjar børnum til at skriva sínar søgur, yrkingar o.a, og at hugleiða um, hvussu skrift og tekstir, kanska ávísar barnabøkur, kunnu vera amboð, sum hjálpa, tá talan er um sorg hjá børnum og ungum.

Aftaná framløgurnar verður høvi at skifta orð um spurningarnar, og har fer Gitte Klein, master í positivari sálarfrøði, at leiða orðaskiftið.

Tiltakið verður leygardagin 25. november kl. 13 í Skálanum