317724374_10227052102421475_6207285824577440020_n

Katrin Joensen-Næs fekk handað Ársins Sálarheilsuvirðisløn fyri 2021

Tað var fimtu ferð, at Sinnisbati, í sambandi við Altjóða Sálarheilsudagin 10. oktober, handaði Ársins Sálarheilsuvirðisløn.

Endamálið við eini slíkari Sálarheilsuvirðisløn er, at heiðra ein ella fleiri, sum hava gjørt eitthvørt átak, tiltak ella annað, sum á serligan hátt hevur varpað ljós á sálarheilsu, og gjørt eitt arbeiði fyri at bøta um og/ella arbeiða sálarheilsu fremjandi. Møguligt var at skjóta einstaklingar og bólkar upp, vísandi til tiltøk, sum verða framd kring alt landið. Almenningurin, einstaklingar og feløg hava fingið hetta høvi at skjóta upp, hvør hevur hendan heiður uppibornan.

Øll kunnu tilnevna, hvør skal hava Sálarheilsuvirðislønina. Ein óheft dómsnevnd avger síðan, hvør skal hava heiðurin, at fáa Sálarheilsuvirðislønina, út frá innkomnu uppskotunum. Virðislønin varð handað á Altjóða Sálarheilsudegnum í gjár, 10. oktobur.

Í ár valdi dómsnevndin at Katrin Joensen-Næs, leikstjóri, skuldi móttaka virðirslønina. Tað var Sinnisbati Ung, sum í ár handaði virðisløninia.

Ársins Sálarheilsuvirðisløn verður latin Katrini Joensen-Næs:

Katrin Joensen-Næs hevur við sínum listarliga arbeiði varpað ljós á lívið við sinnisligari sjúku við serligum denti á teimum, ið standa nær; teimum avvarðandi. Katrin varpar, við novellufilmi sínum “Ábyrgd”, ljós á eitt evni, sum framvegis er tengt at stórari tøgn og tabu. Við filminum hjá sær, er hon við at niðurbróta tøgnina og skapa tilvitsku, um tær kenslur, ið kunnu verða knýttar at leiklutinum sum avvarðandi at einum menniskja, ein hevur kært.

Leikluturin hjá tí, ið stendur hjá, verður ofta lýstur sum hjáleiklutur í frásøgnum um lívið við sinnsligari sjúku og órógvi, men í hesum filmsverkinum dregur Katrin myndatólið mótvegis tí avvarðandi, sum í støðum kann kenna seg bæði mátt- og ráðaleysan. Í filmsverkinum gevur Katrin tí avvarðandi eina rødd og rúmd at verða í teimum kenslunum, ið kunnu uppstanda, tá ein elskaður lýðir av álvarsligari sinnisligari sjúku. Katrin gevur tí avvarðandi loyvi at kenna tær kenslur, ið kunnu vísa seg: einsemi, vreiði og sorg. Samstundis sum hon lýsir áhaldandi og treytaleysan kærleika, gleði og vón.

Katrin Joensen-Næs hevur við filmsverkinum “Ábyrgd” latið upp einar dyr, sum í mong ár einans hevur staðið á glopp. Hon hevur, við nøkrum av teimum førandi føroysku filmsfólkunum, verið við at skapa eina trúliga mynd av, hvussu tað kann kennast at vera avvarðandi.

Vit ynskja við hesari virðisløn, at heiðra Katrinar dirvi og hennara ágrýtni og eldhuga, at taka upp evni, ið hava stórt samfelagsligt virði og týdning.

317724374_10227052102421475_6207285824577440020_n

Ókeypis filmsýning á Altjóða Sálarheilsudegnum 10. oktobur

Sunnukvøldið 10. oktobur kl. 19, bjóða vit til ókeypis filmsýning í Perluni í Tórshavn!

10. oktobur er Altjóða Sálarheilsudagur. Vit sýna um kvøldið svenska filmin "Psykos i Stockholm", sum er ein spælifilmur frá 2020. Rithøvundur og leikstjóri, Maria Bäck, innleiðir filmin.

Sýningin er ÓKEYPIS, men vegna avmarkað pláss, biða vit tykkum tekna tykkum til her:

317724374_10227052102421475_6207285824577440020_n

Stórt tiltak á Altjóða Sálarheilsudegnum 2021

Skráin er nú klár til tiltakið, ið verður á Altjóða Sálarheilsudegnum, sunnudagin 10. oktobur. 

Eins og áður er skráin sera fjølbroytt, og vit gleða okkum, at deila ein góðan dag saman við tykkum, har vit av álvara seta sálarheilsuna og lívið við sinnisligum diagnosum og avbjóðingum í miðdepl. Einki skal tigast burtur, og einans við opinleika og upplýsing koma vit stigmatisering og tabui av diagnosum til lívs.

Evnið fyri Altjóða Sálarheilsudagin í ár er “Sálarheilsa í einum ójøvnum heimi”. Innihaldið í tiltakinum ber tí eisini brá av hesum. 

Øll eru vælkomin! 

 

Altjóða Sálarheilsudagur 2021

Tiltak í Perluni og Reinsarínum, Tórsgøta, Tórshavn

Sunnudagin 10. oktobur kl. 14 til 17.

 

Í Perluni vera básar, har stovnar og feløg kunnu vísa sítt virksemi fram. Á Reinsarínum vera fyrilestrar við ymiskum viðkomandi innihaldi, orðaskifti og tónleikur.

14:00 Erla Matras Jensen, næstforkvinna í Sinnisbata, bjóðar vælkomin og gevur orðið til orðstýraran fyri dagin, Lauru Apol.

14:05 Elsebeth Mercedis Gunnleysdóttir, landsstýriskvinna í Almannamálum, setur dagin.

14:10 Sálarheilsa og minnilutar: Orðaskifti við Bjørt Lind, sálarfrøðingur, Tóru við Keldu, forkvinnu í MEGD, Ugur Kevioglu, nevndarlimur í Amnesty Føroyar og Carol Symphor, umboð fyri LGBT Føroyar, um minnilutastongd.

14:40 Tónleikainnslag við Ester Skála.

14:50 Fyrilestur við Biritu M. Petersen, Birgit L. Hansen og John S. Hammer: "Psykiatri í Føroyum - eitt søguligt innlit".

15:10 Sofaprát við Kristinu Ísfeld, Bjørgu Sivertsen og Signhild Maritu Petersen (@Kropsfatanistar), um tað at vera sárbærur á sosialum miðlum.

15:40 "Hvussu røkka vit á mál?": Orðaskifti v/ Súsonnu Reinert Petersen, yvirlækni í Barna- og Ungdómspsykiatriini, Tormóður Stóra, leiðandi yvirlækni á Psykiatriska Deplinum, Edvard Heen, stjóri í Almannaverkinum, Jónrit Halling, forkvinna í Autismufelagnum og Bjørg Dam, forkvinna í ADHD-felagnum.

16:20 Dansifrøi framførur og bjóðar upp til linedans á Perlutorginum.

16:50 Ársins Sálarheilsuvirðisløn 2021 verður latin.

17:00 Næstforkvinnan, Erla Matras Jensen, takkar fyri í ár og tiltakið endar.

(19:00 Filmsýning í Perluni: "Psykos i Stockholm" (2020). Maria Bäck, rithøvundur og leikstjóri, innleiðir filmin.)

317724374_10227052102421475_6207285824577440020_n

Altjóða Sálarheilsudagur 2021

Altjóða Sálarheilsudagurin er eitt afturvendandi tiltak, sum í ár, fyri fjóðru ferð, verður hildin sum eitt størri kunningartiltak, har fleiri stovnar og feløg fáa høvið at vísa á teirra virksemi innan psykiatriska økið.

 

Tiltakið verður í Perluni og á Reinsarínum í Tórsgøtu í Tórshavn sunnudagin 10. oktober 2021.

 

Upplegg, tónleikur og básar við kunning um stovnar, feløg og onnur, sum arbeiða innan økið, eru við á degnum.

 

Evnið fyri dagin í ár verður "Mental Health in an Unequal World". Tað er evnið sum World Federation for Mental Health hevur valt fyri dagin 2021.

 

Á tiltakinum í Tórsgøtu verða millum annað varpað ljós á:
Ung og sálarheilsu, seksualitetur og sálarsjúku og minnilutastrongd.

 

Drekkamunnur og søtt til góman verður at fáa.

Tiltakið byrjar kl. 14, og tað er ókeypis. Øll eru vælkomin.

 

Skráin fyri dagin verður lýst seinni.

 

--

 

Feløg og stovnar, sum hava hug at hava ein bás hendan dagin, eru vælkomin at seta seg í samband við Lauru Apol, aðalskrivara í Sinnisbata við at ringja á 597913 ella við at skriva til laura.apol@sinnisbati.fo. At hava bás er ókeypis.

317724374_10227052102421475_6207285824577440020_n

Ársins Sálarheilsuvirðisløn 2021 – hevur tú eitt hugskot?

Hevur tú eitt uppskot til hvør skal hava ársins sálarheilsuvirðisløn?

Freistin at senda uppskot inn er mánadagin 4. oktobur á middegi:

Sinnisbati fer fyri fimtu ferð, í sambandi við Altjóða Sálarheilsudagin 10. oktober, at handa eina Sálarheilsuvirðisløn til ein einstakling ella bólk. Almenningurin, einstaklingar og feløg fáa við hesum høvi at skjóta upp, hvør hevur hendan heiður uppibornan.

Endamálið við eini slíkari Sálarheilsuvirðisløn er, at heiðra ein ella fleiri, sum hava gjørt eitthvørt átak, tiltak ella annað, sum á serligan hátt hevur varpað ljós á sálarheilsu, og gjørt eitt arbeiði fyri at bøta um og/ella arbeiða sálarheilsu fremjandi. Høvi er til at skjóta einstaklingar og bólkar upp, vísandi til tiltøk, sum verða framd kring alt landið.

Øll kunnu tilnevna, hvør skal hava Sálarheilsuvirðislønina. Ein dómsnevnd ger síðani av, hvør skal hava heiðurin av at fáa
Sálarheilsuvirðislønina, út frá innkomnu uppskotunum. Virðislønin verður handað á Altjóða Sálarheilsudegnum hin 10. oktobur.

Uppskot kunnu sendast Sinnisbata á sinnisbati@sinnisbati.fo í seinasta lagi mánadagin tann 4. oktober á middegi.

 

317724374_10227052102421475_6207285824577440020_n

Sinnisbati bløðini eru nú teldutøk

Sinnisbati blaðið sum felagið einaferð árliga hevur givið út seinastu trý árini, eru nú teldutøk og kunnu frítt nýtast í undirvísing ella í øðrum viðkomandi samanhangum. Neyðugt er tó at vísa á týðuligari kelduávísing.

2018

2019

2020

Heinta blaðið her: Sinnisbati blaðið_2018

Heinta blaðið her: Sinnisbati blaðið_2019

Heinta blaðið her: Sinnisbati blaðið_2020

317724374_10227052102421475_6207285824577440020_n

Ársins Sálarheilsuvirðisløn 2020 – handað í Perlan, Tórsgøta, tann 10. oktober

Ársins Sálarheilsuvirðisløn 2020 bleiv í kvøld handað á Altjóða Sálarheilsudegnum, sum í ár var eitt stroymað tiltak, hildið í Perluni í Tórshavn.

Viðkomandi sum uttanhýsis dómsnevndina valdi í ár, skuldi hava hendan heiðurin, varð Anna Malan Jógvansdóttir. Tað var landsstýrismaðurin í Heilsumálum, Kaj Leo Holm Johannesen, sum handaði viðislønina.Vit vilja ynskja Onnu Maluni hjartaliga tillukku við væl uppiborðnað virðurslønini!

Sum grungeving, verður sagt:

"Ársins Sálarheilsuvirðisløn fær: Anna Malan JógvansdóttirAnna Malan Jógvansdóttir er rithøvundur og listakvinna. Hon hevur millum annað givið út fleiri yrkingarsøvn og í 2019 gav hon út hybridbókina, "Psykosudrotningin sigur frá", har hon greiðir frá um lívið við psykosu. Hon letur lesaran og áskoðarnar sleppa inn í ein heim, sum tey fægstu kenna. Ein sonn og erlig frásøgn frá einari sera væl orðaðari kvinnu, sum við sínum vøkru og litføgru myndum, gevur okkum innlit í ein heim við sorg, gleði, vreiði, vónloysi og vón.Anna Malan megnar við sínum orðum at skapa eitt forstáilsi, sum tørvur er á. Hjartanemandi er tað, at hon vakurt og hugvekjandi traðkar fram og sigur frá.Við verkinum fær Anna Malan varpað ljós á, hvat ein psykosa er, bæði í orðum og myndum og eisini um leiðina at koma fyri seg aftur.Seinastu árini hevur Anna Malan somuleiðis verið úti og hildið fleiri fyrilestrar á skúlum og stovnum um lívið við psykosu. Einans við upplýsing blíva vit klókari og ríkari sum samfelag. Anna Malan er ein stór fyrimynd fyri mong sum stríðast og koma fyri seg aftur. Fyri hetta arbeiði eigur hon eina stóra tøkk, at hon gjøgnum sína rit- og myndlist gevur okkum loyvi at gerast klókari og ríkari."

Les røðuna hjá Kaj Leo Holm Johannesen her:

https://www.hmr.fo/fo/kunning/tidindi/kaj-leo-holm-johannesen-handar-arsins-salarheilsuvirdislon/

317724374_10227052102421475_6207285824577440020_n

Altjóða Sálarheilsudagur 2020 – skráin er klár!

Altjóða Sálarheilsudagur-tiltakið, sum vit kenna tað, er avlýst.

Undir vanligum umstøðum, hava vit seinastu trý árini, skipað fyri einum stórum og fevnandi tiltak í Østrøm í Havn. Men í ár verður tað øðrvísi!

Hóast ætlanin var, at hátíðarhalda dagin sum vant, men hesu ferð í Perluni og á Reinsarínum í Tórsgøtu, mugu vit ásanna, at tað ikki er ráðiligt, nú korona farsóttin aftur ger um seg í Føroyum. Fleiri teimum sum luttaka á degnum eru fakfólk innan heilsu- og almannaøkinum, og tað eru júst tey, sum eru um teimum borgararum, sum vit í løtuni mugu ansa eyka væl aftir, ikki gerast sjúk av COVID-19.Vit harmast sjálvsagt um støðuna, men vit síggja, at okkara systurfeløg uttanlands hava tikið somu atlit, og vit ynskja so best ber til, at fylgja tilmælinum frá heilsumyndugleikunum. Tað meta vit ikki ber til, um vit savna omanfyri 500 fólk hendan dagin, sum vant.

***

Í staðin skipa vit fyri eitt spennandi talgild tiltak, og skráin er klár!

Tiltakið byrjar kl. 19 og verður stroymt á Facebook og Youtube!

Orðstýrari verður Liljan Weihe.

Kl. 19: Róa Midjord, forkvinna í Sinnisbata, bjóðar vælkomin og gevur orðið til orðstýraran.

Kl. 19:05 Elsebeth Mercedes Gunnleysdóttir, landsstýriskvinna í Almannamálum, sigur nøkur orð.

Kl. 19:10 Sofaprát við Asger Kristian Eið Karinarson. Um tað at fáa eina diagnosu og liva sum vaksin við ADD.

Kl. 19:40 Tónleikainnslag við SWAY.

Kl. 19:55 Fyrilestur við Jákup Boga Joensen: "Tá sálin fjøtrað var".

Kl. 20:15 Sofaprát við Rudi Køhnke um tað at liva við angist. Rudi er danskur sjónleikari og millum annað kendur frá høvuðsleiklutum í "Fidibus" og "Fuglefangerens søn", har hann spælir føroyingin Esmar.

Kl. 20:40 Tónleikainnslag við JASMIN.

Kl. 20:55 Ársins sálarheilsuvirðisløn verður handað av landsstýrismanninum í Heilsumálum, Kaj Leo Holm Johannesen.

Kl. 21:00 Forkvinnan takkar fyri og tiltakið endar.

Vit gleða okkum at “síggja” tykkum!

317724374_10227052102421475_6207285824577440020_n

Jákup Jacobsen fekk ársins sálarheilsuvirðisløn!

Ársins Sálarheilsuvirðisløn 2019 bleiv í dag handað á Altjóða Sálarheilsudegnum, sum bleiv hildin í Østrøm í Tórshavn. Tað var eigarin av Yndi Fitness, Jákup Jacobsen, sum fekk heiðurin fyri sítt arbeiði við at innkludera fólk við sálarligum avbjóðingum. Tað var landsstýrismaðurin í Heilsumálum, Kaj Leo Holm Johannesen, sum handaði viðislønina.

Hjartaliga til lukku við væl uppiborðnað heiðrinum!

Les orðini hjá Kaj Leo Holm Johannesen her:

"Ársins Sálarheilsuvirðisløn 2019 – handað í Østrøm 10. oktober Sinnisbati fer fyri triðju ferð, í sambandi við Altjóða Sálarheilsudagin 10. oktober, at handa eina Sálarheilsuvirðisløn til ein einstakling ella bólk. Tað er almenningurin, einstaklingar og feløg, sum hava fingið høvi at skjóta upp, hvør hevur henda heiður uppibornan. Endamálið við eini slíkari Sálarheilsuvirðisløn er at heiðra ein ella fleiri, sum hava gjørt eitt hvørt átak, tiltak ella annað, sum á serligan hátt hevur varpað ljós á sálarheilsu, og gjørt eitt arbeiði fyri at bøta um og/ella arbeiða sálarheilsu-fremjandi.

Øll hava havt møguleika at skjóta upp, hvør skal hava Sálarheilsuvirðislønina. Ein óheft dómsnevnd hevur síðani viðgjørt tilnevningarnar. Hvørt ár eru nógv góð uppskot komin inn, og tí er altíð torført at velja ein burturúr. Aftur í ár hevur ein samd dómsnevnd valt at tilnevna ein einstakling ella bólk, sum hevur gjørt nakað serligt fyri at varpa ljós á sálarheilsu á ein jaligan hátt og í sínum arbeiði verið við til at lætta um gerandisdagin hjá mongum. Hesaferð verður sálarheilsuvirðislønin handað einum persóni, sum arbeiðir miðvíst við kropsligum venjingum og sum hevur ein hugburð um, at rørsla er týdningarmikil fyri góða heilsu bæði kropsliga og sálarliga.

Viðkomandi arbeiðir innkluderandi við fólki við sálarligum avbjóðingum og hevur uppiborið at blíva heiðraður. Heiðurin hesaferð fer til Jákup Jacobsen, eigari av Yndi Fitness í Tórshavn. Hann hevur avgjørt uppiborið eina virðisløn fyri sín jaliga, blíða og motiverandi hugburð mótvegis íðkarum, sum hava sálarligar avbjóðingar. Ein hugburð um, at rørsla er góð bæði fyri skinn og sinn er nakað, sum Jákup til fulnar hevur víst í sínum arbeiði. Hetta hevur hann víst við at loyva starvsfólki fría atgongd í fitnessmiðstøðina saman við íðkarum, sum eru limir, men vegna sálarligar avbjóðingar, ikki megna at íðka einsamallir. Jákup er altíð sera blíður og rættur gleðiliga eina hjálpandi hond. Hetta ger, at íðkarin kennir seg vælkomnan.

Eisini er hann ein slóðbrótandi fyrimynd, tá hann, sum sjálvstøðugur vinnurekandi, bjóðar einum persóni og mentori við at venja, so tað gerst møguligt hjá einum íðkara at koma í Yndi, sum annars ikki hevði fari einsamallur vegna sínum sálarligu avbjóðingum. Við hesum ynskja vit tær Jákup hjartaliga til lukku og bliðan byr frameftir við arbeiðinum. Takk fyri !"

Kelda: Heilsumálaráðið, 11. oktobur 2019

317724374_10227052102421475_6207285824577440020_n

Altjóða Sálarheilsudagur 2019

Altjóða Sálarheilsudagurin er eitt afturvendandi tiltak, sum aftur í ár, fyri triðju ferð, verður hildin í Öström í Tórshavn 10. oktober 2019.

Upplegg, tónleikur og básar við kunning um stovnar, feløg og onnur, sum arbeiða innan økið, eru við á degnum. Evnið fyri dagin í ár er "sálarlig heilsufremjan og fyribyrging av sjálvmorði", sum WHO hevur valt sum altjóða evni.

Drekkamunnur og søtt til góman verður at fáa.
Tiltakið byrjar kl. 14, og tað er ókeypis. Øll eru vælkomin.

Skráin fyri dagin sær út soleiðis:
Kl. 14:00: Dyrnar lata upp.

Kl. 14:25 Róa Midjord, forkvinna í Sinnisbata bjóðar vælkomin.

Kl. 14:30 Recovery spælir nøkur løg

Kl. 14:45: "Avleiðingar av fosturtøku kunnu vera lívshóttandi. Hvussu hjálpa vit?" v/ Mariu Forrestal úr Rachel's Vineyard Føroyar

Kl. 15:15: "Kanning um sjálvmorðsroyndir í Føroyum í einum 5 ára tíðarskeiði frá 2014 – 2018" v/ Sólrun Joensen og Jórun Højgaard, intensivir sjúkrarøktarfrøðingar við master í heilsuvísund.

Kl. 15:45: Steðgur + kaffi + básar.

Kl. 16:30: "At liva við sjálvmorðstonkum, og tað sum gjørdi at eg valdi lívið framum" v/ Sondy Simonsen

Kl. 17:00: “ Sjálvmorð og fyribyrging – fakta og mýta “ v / Birgit Andresen & Jana Mortensen

Kl. 17:30: "Barna bati seinastu 40 árini" v/ Djóna Eidesgaard, aðalskrivari í Barnabata

Kl. 18:00: "Meining og vón í líðing" v/ Róland í Skorini.

Kl. 18:30: Ársins Sálarheilsuvirðisløn verður handað (Sinnisbati).

Kl. 19:00: Takk fyri hesuferð - síggjast í 2020!

Feløg og stovnar, sum hava hug at hava ein bás hendan dagin, eru vælkomin at seta seg í samband við Lauru Apol, aðalskrivara í Sinnisbata við at ringja á 597913 ella við at skriva til laura.apol@sinnisbati.fo. At hava bás er ókeypis.

Feløg og stovnar sum eru við á hendan dagin eru (GG: fleiri feløg verða løgd afturat): psykiatriska depilin, Almannaverkið, Fountainhúsið, Gigni, Heilsurøktarafelagið, Dugni, Fólkaheilsuráðið, Blái Krossur, Rachel´s Vineyard Føroyar, KRIS, Føroya Politi, Barnabati, ADHD-felagið og Sinnisbati.